Manatua pea soifua ‘ua ma’imau ‘ona ‘o le Kānesa

‘E lē māmā ‘i le Mālō ma le Sosaiete ‘o le Kānesa ‘i Sāmoa, le unā’ia pea ‘o le tete’e atu ‘i le gasegase ‘o le Kānesa, ‘e pei ‘ona māliliu ai le to’atele ‘o nisi ‘o le lalolagi ‘e aofia ai ma si o tatou atunu’u.

‘O le taeao nei, na foa’i ai ‘e le Faletupe ‘o le A.N.Z. le siaki tupe ‘e $10,000 mō le Sosaiete ‘o le Kānesa ‘i Sāmoa, ‘e fa’aauau ai le gāluega fesoasoani mā le alofa mō nai o tatou tagata, ‘ina ‘ia mālamalama manino ‘i āuga ma ‘auala ‘e uia pe ‘a silafia ‘ua a’afia ‘i lea gasegase tugā.

‘I le saunoaga ‘autū ‘a le Afioga ‘i le Minisitā ‘iā Valasi Luapitoifanua To’ogamaga Tafito Selesele, na ia fōfola ai le ‘atoaga ‘o le gāluega ‘a le Mālō, ‘o lo’o fa’atinoina mō le tau tineia ‘o lea gasegase ogaoga ‘ua tele ‘ina a’afia ai nai o tatou tagata.

“O le Kānesa ‘o le tōtōga ‘o le susu ‘o lo’o numera tasi ‘i le aofa’i ‘o Kānesa ‘i Samoa ‘e tusa ma fa’amaumauga ‘a le Matāgāluega ‘o le Soifua Mālōlōina.

“’E ‘i ai le talitonuga ‘e sili atu se fuainumera ‘o’ i latou ‘o a’afia ‘e le’o māua, ‘ona ‘o nisi ‘e lē o’o mai ‘i le falema’i mō se fesoasoani. ‘O le Kānesa ‘o le susu ‘e a’afia tele ai tinā ma tama’ita’i ‘ae mafai fo’i ‘ona a’afia ai ali’i ‘e ui ‘ina lē ta’atele.

“’I le māsina lenei ‘o ‘Oketopa ‘e lagolagoina mālosi ‘e le tatou Mālō le taumafaiga ‘a le tatou Sosaiete ‘o le Kānesa ‘i Sāmoa ‘e ala ‘i le Fa’alauiloa ‘ua fa’aigoaina ‘o le ‘Oketopa Piniki – Pinktober, ‘e fa’alauiloa ai le Kānesa ‘o le susu ‘i totonu ‘o si o tatou atunu’u. ‘Ia fa’atau ina sou lā’ei lanu piniki ‘e ‘ofu ‘i totonu ‘o so’o se fale faigāluega ‘ina ‘ia fa’ailoa ai lō tatou tutū fa’atasi ‘e tete’e atu ‘i lea gasegase leaga, ‘ua tele ‘ina ma’imau ai soifua ‘o tinā, tamā ‘aemaise fānau.”

ATA: Pesetā Tusiga Taofiga (Author) / Sāvali Newspaper.