Manatua pea le tama’ita’i ‘iā Sanarosa: ‘O se vala’au ‘ia fa’atāua le ola, ma tete’e atu ‘i sauāga ‘i tupulaga ‘a Sāmoa

‘O le Aso Faraile, 4 ‘Oketopa 2024 ‘o le ‘a fa’ataunu’uina ai ‘e le To’omaga mō e Puapuagātia (SVSG) se sauniga fa’apitoa, ‘e fa’amanatuina ai le soifua ‘o le tama’ita’i ‘iā Sanarosa, ma toe fa’amalosia ai le fe’au taulogologo mō tupulaga ‘o Sāmoa: ‘ia fa’atāuaina le ola, ola ‘atoatoa, ma ‘ia tāofi le vevesi.

‘O le matā’upu ‘i le tama’ita’i ‘iā Sanarosa, lea na fa’asala ai lona tamā moni ‘i le falepuipui mo le 20 tausaga, ‘ua toe fa’amamafaina ai le mata’utia ‘o a’afiaga ‘o le sauāina ma le tāua tele ‘o le fa’amasinoga tonu.

‘E ui ‘ina sā fa’apu’upu’uina lona olaga ‘i tūlaga mataʻutia, ‘ae ‘o le mana’oga ‘o ona ‘aiga ma e pele ‘ia te ia, ‘ina ‘ia ‘avea le soifua ‘o Sanaroa, ma feau momoli ‘i le atunu’u, ‘ina ‘ia tatou tete’e atu ‘i nei sauāga.

‘O fa’alavelave fa’afuase’i ‘i le vā ‘o tamaiti ā’oga ‘a kolisi ‘i Sāmoa ‘i lenei taimi, ua fa’ailoa mai ai le mana’omia vave mō suiga fou. ‘O lā tatou matāfaioi tu’ufa’atasi ‘i a tatou fānau.

“Ou te u’una’ia le ‘autalavou ‘ia iloa le tāua ‘o le olaga ma ‘ia filifili ala ‘e siitia ai nai lō le afāina.” Saunoa ai Siliniu Lina Chang, le Peresitene ‘o le SVSG.

‘O le sauniga mō Sanarosa ‘o le ‘a faia lea ‘i le maota ‘o lona ‘aiga.

‘O le fa’asoa mai ‘a le SVSG, ‘ia tatou o mai fa’atasi ‘e fa’amamalu ma manatua pea Sanarosa, ma ta’utino atu – ‘o ‘i tatou lava ‘e fausia se lumana’i saogalemu, sili atu ‘ona alofa mō tupulaga ‘o Sāmoa.

‘Ia tatou tete’e atu ‘i sauāga ma faʻamalosia se tupulaga ‘e faʻapelepeleina le ola ma lagolago le tasi ‘i le isi.

Mō nisi fa’amatalaga ‘e uiga ‘i le sauniga mō Sanarosa, fa’amolemole fa’afeso’ota’i le SVSG Helpline ile 800-7874.

ATA: Sāmoa Victim Support / Supplied.