Mafua’aga o le pe so’o o le ‘eletise i lenei vaiaso

E lē faigofie le galuega fa’atino a le E.P.C. i le taumafai pea ina ia mautinoa, e fa’atumauina le atoatoa o lana auaunaga faifaipea mo Samoa ma ona tagata.

Ua fa’ailoa manino e le Ofisa Sili o Pulega o le Fa’alapotopotoga o Malosi’aga Tau ‘Eletise iā Faumui Tau’ili’ili Iese Toimoana, ua mae’a toe fa’aleleia a’afiaga na tula’i mai, na mafua ai ona motusia so’o le ‘eletise i le amataga o lenei vaiaso mo le atunu’u atoa.

I le feiloā’iga a Ofisa Fa’asalalau ma Faumui, na ia talatala manino ai le mafua’aga o lea fa’aletonu;

“O le fa’afitauli lea na feagai nei ma tatou, o le lē lava o le tatou fa’asoa mo le ‘eletise. Peita’i o le taimi lenei lea ua toe atoatoa lelei le tatou fa’asoa e pei ona i ai tatou afi lea sa lisiina mai e fa’aāoga.

“O le fa’afitauli sa iai, na mafua mai i laina ‘eletise mālolosi lea e fa’asoa atu ai le ‘eletise i le tatou atunu’u. E tolu nofoaga tetele lea e fa’asoa atu ai le tatou ‘eletise, o Fiaga lea o lo’o i ai a tatou afi tetele, o Fuluāsou, fa’atasi ai ma Tanugāmanono, lea o lo’o tu’ufa’atasia ai le ‘eletise, ae fa’asoasoa atu mo le mamalu lautele o le tatou atunu’u.

“O le motusia ai o le ‘eletise i le po o le Aso Gafua ma le po o le Aso Lua, na afua mai ona ua mu le uaea ‘eletise mālolosi [cable] lea e feso’ota’i ai Fuluāsou ma Tanugāmanono.

“Mo le silafia, o le malosi’aga atoa o le tatou ‘eletise, lea o lo’o i Fuluāsou ma Fiaga. O le tele o vaega o le taulaga i le itu i Sasa’e, o lo’o fa’asoa atu i Tanugāmanono le ‘eletise, a’o le vaega i sisifo o Fuluāsou, o le isi vaega i tuā i Aleipata, o la e fa’asoa ane i Ta’elefaga e fa’apea fo’i i Fiaga i le itu lea i Sisifo.

“O le tulaga lea na tula’i mai i uaea mālolosi lea e sau mai lalo o le ‘ele’ele mai lava i Fiaga e tau i Tanugāmanono, lea sa fa’aletonu, ma o se vaega o le afio’aga o Vaimoso, lea sa fa’atino ai le galuega a le aufaigaluega, lea sa tula’i mai ai le fa’aletonu.

“O uaea mālolosi lea na mū, e fa’alagolago i ai le fa’asoasoaina o le tatou ‘eletise i vaega ‘ese’ese o le tatou atunu’u. A fa’aletonu uaea mālolosi nei, e fa’aletonu fo’i le fa’asoaina atu o le ‘eletise i maota ma laoa.

“Sa fa’atino le galuega toe fa’aleleia a le Fa’alapotopotoga, ma o lea ua toe fo’i i le lelei le fa’asoasoaina atu o le tatou ‘eletise. E lua aso o fa’agasolo le galuega a le aufaigaluega, ma o le vaveao o le Aso Lulu, na fa’atoā fa’ame’a ai loa le galuega, ma toe lelei ai le fa’asoaina atu o le ‘eletise.

“O uaea mālolosi nei, ua silia ma le 10 tausaga o ta’atitia i lalo, ma o lo’o masalomia ua sao se vai i totonu o nei uaea mālolosi ua mafua ai ona mū. O le motusia fa’afuase’i fo’i o le ‘eletise, e le’o mafai ona iloa, ona e le’o mafai ona fa’ailoa mai vaega o lea o le ā motusia ‘eletise, e te’i lava i le motusia fa’afuase’i.”

Ua fa’ailoa mai fo’i e Faumui o le a mataitūina pea e le Fa’alapotopotoga o Malosi’aga tau ‘Eletise uaea mālolosi nei, ina ia mautinoa e lē toe tula’i mai se fa’afitauli i le lumana’i.

Tusia: Taunuuga Toatasi

ATA: Savali Newspaper