Māe’a fonotaga ‘a Kōvana ‘a Faletupe ‘o ‘Inivesi ‘i Ātīna’e tetele ‘a ‘Āsia na ‘auai atu ai le Afioga ‘i le Sui Palemia ‘i Qatar

‘Ua māe’a le fonotaga lona 11 ‘a le Komiti ‘o Kōvana ‘a Faletupe ‘o ‘Inivesi ‘i Ātīna’e tetele ‘a ‘Āsia, lea na faia ‘i le aso 28 – 29 Sētema, na ‘avea ai le Afioga ‘iā Mulipola ‘Anarosa ‘Ale Molio’o ‘o le Sui Palemia ma le Minisitā ‘o Tupe, ‘o le ta’ita’i ‘i le ‘aumalaga ‘a le atunu’u ‘e talanoaina fuafuaga ‘i ni polōketi fou.

‘O se matā’upu taua lenei, ‘auā ‘o lo’o taumafai Sāmoa ‘e fa’amautū lana polōketi muamua lava, ‘o lo’o fa’atupeina mai ‘e lenei fa’alāpotopotoga ‘o faletupe, talu mai ‘ona fai pā’aga mai le 2018. Na fa’a’autūina lenei fonotaga ‘i le “Fausia lea ‘o Ātīna’e tetele mo ā Taeao, A’afiaga ma Su’esu’ega fou” po’o le “Tomorrow’s Infrastructure, Impact and Innovation”.

Na tu’uina atu ‘e le ‘aumalaga ‘a Sāmoa lō lātou manatu ‘e fa’atatau ‘i fuafuaga ‘o le fa’alauteleina ‘o ‘au’aunaga mo tagata ‘o lo’o lātou fa’atauina lenei tautua, ma le fa’amālosia ‘o su’esu’ega fou fa’atekonolosi ‘i totonu ‘o polōketi ‘o lo’o fausia. ‘O Sāmoa na ‘avea ma sui ‘o lenei faletupe ‘o lo’o ‘i totonu ‘o Beijing ‘i Saina, ‘āmata mai ‘iā ‘Aperila 2018, ‘e ui ‘ina ‘āmata āloa’ia le Faletupe ‘a le AIIB ‘i le 2016 ‘e le 57 atunu’u na fa’avaeina.

‘O lenei fono lona 11 ‘ua ‘avea ai ma la’asaga tāua tele mo Sāmoa, ‘e suia ai lona tūlaga mai le na’o le ‘avea ma sui ‘auai, ‘i le ‘avea ma atunu’u ‘o lo’o mauaina sao ‘o manuia ‘o ia polōketi.

IMAGE/ATA: Government of Samoa Facebook