LISTEN

Lē toe mānana’o le matou itūmālō ‘i le fōma’i lea ‘i Sātaua – Faipule ‘o Vaisigano 1

by | Jun 19, 2026 | Sāmoa, Top Headlines

‘O le taeao nei ‘i le fonotaga ‘a le Palemene, a’o saunoa ai le Afioga ‘i le Sui Faipule ‘o le itūmālō Vaisigano 1, le Afioga ‘iā Amituana’i Mālolo Tautofi Roma ‘i le lauliliuina ‘o le Tala Fa’atatau ‘Autū ‘o le Tupe 2026/2027, na ia tōlaulauina ai le tele ‘o fa’aseā ‘a lō latou itūmālō ‘e fa’asaga ‘i le latou fōma’i ‘i le falema’i fa’aitūmālō ‘i Sātaua.

Na saunoa le Afioga ‘iā Amituana’i, “ ‘ina ‘ua tūla’i mai le faigāmālō lenei filifilia ‘iā ‘Oketopa ‘e o’o mai ‘i le māsina lenei, ‘e fai ā sina fa’anoanoa ‘o lo’u tagata, ‘i le tele ‘o fa’aseā ‘ua ‘aumai ‘e si o’u itūmālō ‘ona ‘o le ‘au’aunaga ‘a le fōma’i ‘o lo’o ‘i le matou itūmālō, ‘i le falema’i lea ‘i Sātaua.”

Na fa’ailoa ‘e le Sui Faipule ‘i le Minisitā ‘o le Soifua Mālōlōina, sa faia lana su’esu’ega ma na maua ai:

  1. ‘O le tele ‘o nai āiga ma nai tagata, ‘a ō atu ‘i le falema’i – ‘e leai se fōma’i
  2. ‘Ae ‘a iai fo’i le fōma’i, ‘e lē mafai ‘ona sau ‘e va’ai ma’i, ‘ae fa’atonu mai teine fōma’i ‘i luga ‘o le telefoni
  3. ‘O nisi fo’i ‘o fanau, ‘ua māliliu ‘ona ‘o le leaga ‘o le ‘au’aunaga

Saunoa Amituana’i, “ou te lē tu’uā’ia tama’ita’i tausi soifua, ‘ae pei ‘e fa’atūtū la’u fa’amatalaga ‘ona ‘o le fōma’i lea ‘i le matou itūmālō.”

“’O le tala fo’i ‘o le matou itūmālō – mātou te lē toe mānana’o ai ‘i le fōma’i lea.”

Saunoa le Faipule:

  1. ‘Ua tele fo’i nai tagata mātutua, ‘ua fano le soifua ‘ona ‘o le fa’atamala, tele ‘o taimi ‘e ō atu ‘e leai se fōma’i

“‘O le vaiaso lea na te’a nei, na logo mai ai a’u ‘ou te alu ‘i le falema’i ‘o lo’o tīgāina si o’u tua’a. ‘Ou te alu atu ‘i le falema’i, ‘o lā ‘e taufa’amanava ‘i le ‘okesene – o’u fesili, fa’amolemole po’o iai se fōma’i – ‘e leai fo’i se fōma’i”

“’Ona ‘ou fesili lea ‘i tama’itai fōma’i to’atolu, ‘o fea ‘o iai le tatou fōma’i?

Tali mai: “O lā ‘e alu ‘i Apia ‘e fai lana ā’oga, na alu ā ‘i le taimi ‘o le tūto’atasi” a’o lea ‘ua leva ‘ona ‘uma le tūto’atasi, a’o lea ‘e leai se fōma’i ‘i Sātaua.

Sā tu’uālalo le Afioga ‘iā Amituana’i ‘i le Afioga ‘i le Ali’i Minisitā fa’apea le Matāgaluega, ma le Afioga ‘i le Palemia, ‘ia alofagia lenei matā’upu.

Na tūla’i le Afioga ‘i le Minisita Hon. Va’aaoao Salumalo Alofipo: “tatou te lagona ‘uma lava, ‘afai ‘ua tu’ua le mālō, usufono nisi ‘o toa ‘o le itūmālō ‘ona ‘o le valetu’ulima ‘o le fa’atuatuaga ‘a le mālō ma le matāgaluega ‘ona ‘o le fōma’i, ‘e lagona ai ā le fa’anoanoa. Ma ‘ou te lē ‘alo ‘i le ata ‘o le lā’au.”

Na saunoa le Afioga ‘i le Minisitā, ‘o lea ‘o le ‘a vave fai ai se fuafuaga, ‘auā “’e lē ‘o sona faiva le tūlei ‘ese ‘o le mana’oga tūpito ‘o le ola ma le oti ‘ae tatau na ia fa’avave ‘ona faia se fuafuaga.”

Sā fa’aopopo fo’i le Afioga ‘i le Palemia, Hon. La’aulialemalietoa Leuatea Fosi Schmidt, “‘o le matuā tele ‘o fa’afitauli ‘i le soifua mālōlōina, ‘o lo’o taumafai ‘e togafitia ‘i le taimi nei. ‘O le fesili ‘o ā mea ‘a tatou fōma’i ‘o fai nei?”

‘O lo’o māta’itūina nei ‘e le mālō le tele ‘o nei fa’afitauli.

CAPTION: Sataua District Hospital. Vaisigano 1 MP
IMAGE/ATA: SCR (file)