Lē ātoa le quorum, po’o le fuainūmera mo’omia ‘o sui usufono ‘e fa’ataunu’uina ai le fono ‘a le Palemene ‘i le 2pm

‘E sīlia ma le 20 minute ‘e te’a ai le 2pm, ‘o fa’atalitali le Afioga ‘i le Fofoga Fetalai Hon. Papaliʻi Liʻo Oloipola Taeu Masipau, pē ‘o ātoa le quorum, po’o le fuainūmera mo’omia ‘o sui usufono ‘o le Palemene, ‘e mafai ai ‘ona fa’ataunu’uina le fonotaga lea na fuafuaina mō le itula ‘e 2 ‘i le aoāuli nei.
‘O se tūlaga maoa’e na maitauina,’e ‘amata ifo le fonotaga, ‘e lē ‘o nofoia ‘e le itū agai ‘o ā latou nofoa, se’ia vaganā ai le Pālemia, ma lana Kapeneta fa’apea nisi ‘o sui faipule ‘a le FAST, ‘ae ‘e lē ‘o iai fo’i sui ‘uma ‘e 20 ‘a le FAST, lea ‘e ‘ese mai ‘i a’i latou ‘o lo’o lagolagoina le Tama’ita’i Pālemia, ‘i le taimi nei.
‘Ua toe tolopō le fonotaga ‘i le 8pm ‘i le afiafi nei, ma na saunoa ai le Pālemia, ātonu ‘e maua ai le numera ‘e fa’aauau ai pea gāluega ‘a le fono, ‘e pei ona pāsia ‘i le lafo na fa’atūina ‘e le Pālemia ‘i le taeao nei.
‘O lalo ‘o le Fa’avae, Vāega 5 (Parliament), Matā’upu 57 (Quorum) ‘o lo’o aiāia ai le lē mafai ‘ona fa’atinoina ‘o se galuega ‘a le fono, se’ia vaganā ‘ua maua le numera ‘e silia ma le ‘afa ‘o nofoa ‘o le Palemene, ‘e fa’atino ai se fonotaga.
Part V, section 57, “No business shall be transacted at any sitting of the Legislative Assembly if objection is taken by any Member of Parliament present that the number of Members present is (besides the Speaker or other Member presiding) fewer than one-half of the total number of Members of Parliament (excluding vacancies).”
ATA: Screenshot of Parliament at 2pm – no quorum to hold session.