Lapisi lafoa’i e maua ai isi oloa fou, fa’ama’ite lelei mo Vailu’utai

Ua galulue fa’atasi le Matāgaluega o Puna’oa Fa’alenatura ma le Si’osi’omaga ma le afio’aga o Vailu’uta’i, i le polōketi mo le tu’u ’ese’eseina o lapisi ma otaota.

O le Fa’alapotopotoga a le J.I.C.A. sa latou fa’atupeina kalone lapisi e silia i le 70.

I le saunoaga autū a le Afioga i le Minisitā o le Matāgaluega o Puna’oa Fa’alenatura ma le Si’osi’omaga iā ‘Ale Vena ‘Ale, sa ia tā’ua ai le tāua tele o lea polōketi, i le tulaga o le soifua mālōlōina lelei o ‘āiga ma le afio’aga.

“O lenei polōketi ma galuega fuafuaina, o le ā fesoasoani lea i le fa’aitiitia o lapisi e tu’uina atu ma lafoa’i i le tatou nofoaga autū i Tafa’igata.

“O nei itu’āiga lapisi o ‘apa inu alamini, ma fagu uga [plastic bottles and aluminum cans] o le ā mafai ona toe fa’aāogaina e maua ai nisi oloa fou.

“O le ā mafai fo’i ona a’oa’oina ai le afio’aga aemaise i tapulaga i auala e fa’aitiitia ai le fa’aāogaina o uga ma i ai itu’āiga otaota lea e fa’aleagaina ai lo tatou si’osi’omaga aemaise le gataifale ma ogāsami o le atunu’u.

“Ua manatu le Matāgaluega, o le amataga lea o se faigāpa’aga, o le ā telē sona sao mo le tatou atunu’u, auā o lesona o le ā mafai ona maua atu i le polōketi nei, nisi fo’i faigāpa’aga fa’apenei i totonu o isi nu’u i le lumana’i.”

Sa fa’afetaia e le Minisitā ia le Mālō o Iāpani ona o le agalelei i lenei fesoasoani tauala mai i le J.I.C.A. ma o se fa’ama’ite lelei lea mo afio’aga ta’itasi i le aga’i atu i le lumana’i. 

Tusia e: Taunuuga Toatasi

ATA: Savali Newspaper