Lapata’i le Matāgaluega ‘o Leoleo mō le saogalēmū ‘o Tinā ma Tama’ita’i

‘Ua rīpoti ane ‘e le fale’oloa ‘o Lynn Supermarket ‘i Moto’otua le osofa’ia ai ‘o se tinā Saina na ā’gai ane ‘e faia lana fa’atau ‘i le fale’oloa ‘ae fa’afuase’i ‘ona se’i ‘e se ali’i le ‘ato na maua ‘i mea pu’e ata, sā tūtū ai lava ‘i tafatafa ‘o le faitoto’a.

‘E le ‘i mafai ‘ona maua ‘e ‘i lātou na tuliloaina lenei ali’i ma ‘ua sa’ili nei ‘e leoleo ‘e fa’aogāina ai ata na pu’eina ‘i mea pu’e ata. Fa’atasi ai ma le rīpoti na tu’uina ane ‘e le fale’oloa ‘o se tasi fo’i ‘o ali’i na faigaluega ai lava ‘i le pamu penisini a Le Lama ‘o lo’o sā’ilia fo’i ‘e leoleo ‘ua sola ‘ese ma ‘ave ‘uma tupe ‘o le pamu penisini na maua ‘i lea aso.

Ma ‘ua fa’amauina ai ‘e le Matāgaluega ‘o Leoleo ‘i rīpoti ‘o soligātūlāfono ‘e tu’uina atu, ‘o le tele ‘o ‘i lātou ia ‘e osofa’ia ‘e tupulaga talavou ‘e se’i ‘ato, ‘o telefoni ma nisi ‘o mea tāua fa’atasi ai ma le lagaina ‘o ta’avale, ‘o le itupā ‘o tinā ma tama’ita’i, ma ‘ua fautuaina ai le atunu’u ‘ina ‘ia silasila toto’a ma ‘ia manatua le saogalēmū ‘i so’o se vāega ‘e āga’i ‘iai tinā ma tama’ita’i, pē fa’atau pē āga’i fo’i ‘e savali fa’amālositino ‘i luga ‘o taligalu ‘ina ‘ia mautinoa ‘o lo’o saogalēmū le soifua.

IMAGE/ATA: Lynns Supermarket & Bakery, Samoa