Lagolagoina ‘e Sāmoa le Ta’utinoga ‘a New Delhi

‘Ua fa’amautūina ‘e Sāmoa lona lagolagoina ‘o le Ta’utinoga ‘a New Delhi, po’o le New Delhi Declaration, ‘i le fa’aleleia ātili ‘o feso’ota’iga ma le fa’aleleia ‘o ātina’e ‘i totonu ‘o nu’u ‘o ‘Asia ma le Pāsefika ‘e ala ‘i lea ta’utinoga, ‘i le fonotaga lona lua ‘a Minisita ‘o ‘Asia-Pāsefika ‘i Va’alele Sivili 2024, na usuia ‘i ‘Initia ‘i lenei vaiaso.

Sā ‘avea le Afioga ‘i le Minisita Lagolago, le Afioga ‘iā Niuava Eti Malolo ma le Fa’atonu Sili ‘o Va’alele Sivili/Sui Lagolago MWTI, Afioga Lauano Yvonne Talaitupu Mariner-Viliamu ‘o le Matāgāluega ‘o Gāluega, Fela’uā’iga ma Ātina’e ‘Ese’ese ma sui ‘o le Mālō Sāmoa ‘i lea fonotaga.

‘O le Ta’utinoga ‘a New Delhi, ‘o le ‘a mafai ai ‘ona maua ‘auala ‘e gālulue so’oso’otau’au ai ‘o Sāmoa ma atunu’u mai ‘Asia ma le Pāsefika ‘i totonu ‘o le li’o ‘o va’alele sivili ‘e ausia ai ta’utinoga tutusa ma fa’atino so’o se fa’ai’uga talafeagai ‘i lu’itau ‘o lo’o feagai ma le vāega ‘o va’alele.

ATA: Ministry of Works, Transport and Infrastructure Sāmoa