Lagolagoina ‘e le mālō le talosaga ‘a le Pacific Justice mo avanoa ‘ia manuia ai tagata Samoa ‘i le vā ma Niu Sila

‘Ua saunoa fa’alaua’itele le Afioga ‘i le ta’ita’i ‘o le atunu’u, La’auli’alemālietoa Polata’ivao Fosi Schmidt, ‘i le feiloa’iga ma le Fa’alāpotopotoga ‘o le Pacific Justice lea ‘o lo’o ta’imua ai le Afioga ‘iā ‘Anae Arthur ‘Anae, mo le fīnauina ‘o avanoa ‘ina ‘ia manuia ai o tātou tagata Sāmoa ‘i le vā ma Niu Sila.

‘O se tasi ‘o ia taumafaiga, ‘e aofia ai le mafai lea ‘ona maua ‘o se visa 6 māsina mo tagata ‘e manuia mai le se’i ‘o le quota, ‘e malaga ai ‘i Niu Sila ‘e sa’ili galuega. ‘E fa’atasi ai ma leisi talosaga ‘o lo’o taumafai ‘e tu’u fa’atasi, ‘o le mafai lea ‘ona ulufale atu o tātou tagata ‘i Niu Sila ‘e aunoa ma se visa mo le 3 māsina.

Na saunoa ‘Anae, ‘e na’o le tasi le avanoa ‘e ulufale atu ai tagata Sāmoa ‘i Niu Sila, ‘ua na’o le quota. ‘E na’o Sāmoa fo’i ‘i atunu’u ‘i le lalolagi, ‘e ulufale atu ‘i Niu Sila ma toe fa’amautū ai pepa nofomau. ‘O aiaīga ‘o lo’o iai ‘i le taimi nei ‘i le tūlāfono ‘o le quota, ‘a fa’amanuiaina sē tasi ‘i le se’i, ‘e sa’ili muamua ‘ia maua sana galuega, ‘ona fa’ato’ā mafai lea ‘ona fa’ataunu’u isi vāega ‘o le talosaga.

‘O le fa’amoemoe ‘a le faigāmalaga nei, ‘ina ‘ia sā’ilia le lagolago ‘a ō tātou tagata ma le atunu’u, ‘ina ‘ia silia ma le 50,000 ni saini ‘e lagolago ai le mau ‘e tu’uina atu ‘i le palemene ‘a Niu Sila ‘i le māsina ‘o Ianuari 2027.

IMAGE/ATA: Savali Newspaper Facebook