Filifīlia Don Opeloge ma ‘Ave Fu’a ‘a Sāmoa ‘i le ‘Olimipeka ‘i Pāle 2024

‘O le Aso Lua na fa’asilasila ai ‘e le SASNOC, po’o le pūlega ‘o ta’aloga ‘a le atunu’u, ‘o le vāega fo’i ‘o lo’o nafa ma le fa’afoeina ‘o le ‘au ‘Olimipeka ‘a Sāmoa, le filifīlia ai lea ‘o le susuga ‘iā Don Opeloge, ‘e fai ma ‘Ave Fu’a mo Sāmoa ‘i le sauniga ‘e tatalaina āloā’ia ai le ‘Olimipeka ‘i Pale, Farani ‘i le Aso 26 ‘o Iulai 2024.

‘O le susuga ‘iā Opeloge, ‘o se tasi lea ‘o ālo ‘o le tatou atunu’u ‘o lo’o tauvā ‘i le ta’amilosaga ‘o le ‘au si’isi’i u’amea māmāfa (weight-lifting) mo ta’aloga ‘o le ‘Olimipeka ‘o lenei tausaga. 

‘O le galuega ‘a Opeloge ‘i le sauniga ‘e tatalaina āloā’ia ai le ‘Olimipeka, ‘o le fa’afeāoina lea ‘o le tatou ‘au ma pūlega ‘uma mai Sāmoa, ‘e ala ‘i le ta’ita’iina lea ‘o le tāgāvai ‘a le atunu’u ‘i lūmāmea ‘o le lalolagi ‘o le ‘a aofia potopoto ‘i nei ta’aloga faitaulia ‘o le ‘Olimipeka 2024.

ATA: Sāmoa Capital Radio (file).