Feiloā’i le Kōmesina fou ‘o Leoleo ‘a Niu Sila ma le Minisitā ‘o le Matāgāluega ‘o Leoleo ‘a Sāmoa

O le taeao nei na feiloa’i atu ai le Komesina Fou o le Matāgaluega o Leoleo a Niu Sila, le Susuga iā Richard Chambers i le afioga i le Minisitā o le Matāgaluega o Leoleo, Falepuipui ma le Ola Toe Fuatā’ina a Samoa iā Faualo Harry Jeffrey Schuster.

O le Susuga iā Chambers na tofia e avea ma Komesina Fou o Leoleo a Niu Sila i le Aso 25 o Novema i le tausaga ua mavae 2024.

I lana ulua’i malaga mai ai i Samoa mo le tolu aso o se Komesina o Leoleo, na maua ai le avanoa e soālaupule ai ma le afioga i le Minisitā iā Faualo, matā’upu e mo’omia ai pea le galulue fa’atasi o Leoleo a Niu Sila ma Samoa.

I le feiloā’iga a le Savali ma le afioga iā Faualo, na ia fa’amanino ai, o lenei feiloā’iga sa aga’i tonu lava i matā’upu tupito o lo’o mana’omia ai le fesoasoani mai a le Matāgaluega o Leoleo a Niu Sila mo Samoa.

E aofia ai le galulue fa’atasi e unā’ia le avea o le Nofoaga Fa’apitoa mo toleniga ma a’oa’oga a Leoleo a Samoa o lo’o i Tafa’igata [Samoa Police Training Academy] o se nofoaga fa’apitoa tutotonu mo a’oa’oga ma toleniga fa’aleoleo a le Pasefika atoa.

Sa talanoaina fo’i le fa’aauau pea o le fesoasoani mai o Niu Sila i leoleo o lo’o auina mai e galulue mo se vaitaimi i Samoa nei, fa’atasi ai ma le tu’uina atu o Leoleo Samoa e a’o’oga ma fa’alautele lo latou tomai fa’aleoleo i totonu o Niu Sila.

Ma o lea fesoasoani o lo’o agalelei mai ai fo’i ma le Mālō o Ausetalia e ala i le auaunaga a le Australian Federal Police [A.F.P.].

Fa’ailoa e Faualo, o le isi itu na o’o i ai le lā talanoaga, o le fesoasoani mai o Niu Sila i tapenaga a le Matāgaluega o Leoleo, Falepuipui ma le Ola Toe Fuatā’ina a Samoa i lana taligāmālō i le Fonotaga a Minisitā o Leoleo uma o le Pasefika iā Aokuso o le tausaga nei 2025.

O le isi fuafuaga o le Fonotaga a Komesina uma o le Pasefika o le ā usuia i Niu Sila, ma o le isi lea avanoa tāua e saga fa’atalanoaina ai pea nisi auala mo le lumana’i e mafai ai ona galulue fa’atasi ai Leoleo o Mālō e lua.

O le ‘ava o le feiloā’iga o le ā faia i le taeao nei, soso’o ai ma lana asiasiga i nisi o auaunaga a le Matāgaluega o Leoleo, Falepuipui ma le Ola Toe Fuatā’ina a’o le’i toe taliu ai i NZ i le aso a taeao.

ATA: Vaitogi Asuisui Matafeo (Savali Newspaper)