Feiloa’i Aloā’ia le Palemia ma le Minisita ‘o le Vā ‘i Fafo ‘a Niu Sila ‘i ‘Aukilani

‘O le Aso Sā 19 ‘o ‘Oketopa 2025 na feiloa’i aloā’ia ai le Afioga ‘i le Palemia Hon. La’aulialemalietoa Polata’ivao Fosi Schmidt, ma le Afioga ‘i le Minisita ‘o le Vā ‘i Fafo ‘a Niu Sila, Rt Hon. Vaovasamānaia Winston Peters.

‘O lea feiloa’iga na fa’atinoina ‘i le Fale ‘o Sāmoa ‘i Māgele, ‘Aukilani ma sā fa’atasi ai le Afioga ‘i le Konesula ‘o Sāmoa ‘i Niu Sila ‘iā Afemata Palusalue Faʻapo II.

‘I se pepa ‘o fa’amatalaga ‘o lo’o tā’ua ai matā’upu ‘o le lā feiloa’iga:

1. ‘O le vā feāloa‘i fa’apitoa ‘i le vā ‘o Sāmoa ma Niu Sila, ‘e fa’avae ‘i la talafa’asolopito ma le feso’ota’iga vāvālalata ‘a tagata ‘o atunu’u ‘e lua.
2. Matā’upu tau ‘i le puipuiga ‘o tuā’oi ‘aemaise le gālulue fa’atasi ‘e sā’ilia ma su‘eina ma taofia ‘o le fefa‘ataua‘iga ‘o fuāla’au fa‘asāina.
3. Atina‘eina ‘o pisinisi tuma‘oti ‘i Sāmoa ‘e aofia ai fo‘i ma le vāega ‘o ‘auina atu ‘i fafo ‘o ‘oloa ‘a le atunu’u.
4. Polokalame ‘a Niu Sila mō Tagata Faigaluega Fa’avaitaimi (Recognized Seasonal Employer Scheme).

‘O lo’o ‘i ‘Aukilani pea le Afioga ‘i le Ali’i Palemia mō togafitiga, mā ‘ua fa’asolosolo ‘ina manuia. ‘E lē ‘o mautinoa se aso ‘e toe taliu ai le faigāmalaga ‘i fanua.

ATA: PM’s FB.