Fautuaina Fono fa’avae ‘e mulimulita’ia ta’iala mai le Komiti Fa’atonu mō Gāluega Fa’avā’itaimi  

‘Ua fautuaina ‘e le Minisitā mō le Polokalame ‘o Gāluega Fa’avā’itaimi ‘o Lautimuia Uelese Va’ai, fono fa’avae ‘e le’i resitala atu ‘i lalo ‘o faiga fa’avae fou mō le polokalame ‘ua iai nei.

‘I se fa’atalanoaga na ia fa’amaonia mai ai le fuainūmera ‘o fono fa’avae ‘ua mā’ea ‘ona resitala atu mō le polokalame, lea na ia fa’aalia ‘ua sila ‘i le 30 fono fa’avae ‘ua mā’ea ‘ona resitala, ‘ae ‘o lo’o fa’agāsolo atu lava isi.

‘O le faiga fou ‘ua iai nei ‘o le fa’amatu’u ‘i tua ‘i fono fa’avae le filifilia ‘o ‘i lātou ‘e malaga ‘i gāluega fa’avā’itaimi, mā ‘e lē fa’amālosia fono fa’avae ‘e resitala atu ‘i le mālō.

Tā’ua ‘e Lautimuia ‘e iai nisi ‘o vāega ‘o lo’o mana’omia ‘e nisi ‘o fono fa’avae ‘e le’i resitala atu, ‘e ao ‘ona fa’amālamalama lelei ‘e lē gata ‘i le fa’atinoga ‘o lā lātou pitolā’au ‘ae fa’apea fo’i ‘i le vā mā le saofa’iga ‘a ali’i ma faipule ‘o afio’aga ta’itasi.

Saunoa Lautimuia ‘o isi fono fa’avae, ‘e tuai ‘ona resitala ‘ona ‘o le fia mānan’ao ‘ia mālamalama muamua.

Sā fesiligia fo’i le Minisitā ‘e fa’atatau ‘i tagata na resitala muamua ‘i le ‘ōfisa ‘a’o le’í fa’amamalu faiga fa’avae fou ‘o le polokalame, ‘ae na tali manino le Minisita, ‘o faiga fa’avae fou ‘ua iai nei, ‘e aofia ai le filifilia ‘e ali’i ma faipule ‘o tagata ‘o lātou afio’aga ‘e agava’a ‘e malaga atu ‘i lalo ‘o le polokalame ‘o gāluega fa’avā’itaimi.

ATA: Sāvali Newspaper.