Fautuaina ‘e le Fa’alāpotopotoga Fa’asao Fa’avā’omālō le toe totōina ‘o ‘Amu mō le lelei ‘o le gātaifale

O le asō, na tatala aloā’ia ai se tasi o Polōketi a le Fa’alapotopotoga o Fa’asao Fa’avāomālō e ta’ua ole KIWA RESTORE PROJECT.

O lenei Polōketi o le ā mafai ona fesoasoani ai i afio’aga i Samoa e toe tapu’e ma toe fa’aleleia le gataifale aemaise o puna’oa ‘ese’ese e pei ona i ai i’a ma figota, togātogo ma ‘ā’au.

O le afioga iā Leausalilo Leilani Duffy, o le Fa’atonu Fa’apitoa o le Fa’alapotopotoga o Fa’asao Fa’avāomālō i Samoa, sa saunoa fa’apitoa e tatala aloā’ia lenei Polōketi.

Ua amatalia e le Ofisa nisi o a’oa’oga ina ia mafai ona tufa atu i Sui o nu’u lo latou silafia e fa’atatau i le totōina ma le toe tapu’eina o ‘amu i totonu o gataifale ma mautinoa e toe fa’aleleia puna’oa ua fa’aleagaina i suiga ma’ale’ale o le tau.

Sa tu’uina atu fo’i e le Ofisa nisi o meafaigaluega i Sui o afio’aga e to’afitu sa auai i le tatalaina o le Polōketi i le asō, e aofia ai Faleātiu, Lalovī, Fuailolo’o, Sālua – Uta, Apa-i-Uta, Samatau ma Matāutu Falelatai.

O meafaigaluega e aofia ai se’evae ‘a’au, mata fagota, ma mea mānava. O le ‘auga ma le fa’amoemoe o nei meafaigaluega ua tu’uina atu i tua i alalafaga, ina ia mautinoa e saogālēmū i latou o le ā gafa ma le totōina o ‘amu.

Saunoa le afioga iā Su’a Ulusapeti Ti’iti’i, o le Pule Fa’atonu o le Polōketi ole KIWA RESTORE, e silia i le $50,000 le seleni sa fa’atupeina ai nei meafaigaluega ma sa ia talosagaina ai le mamalu o le aofia ina ia fa’aāoga tatau mo le fa’atinoina o vaega mo’omia uma mo lenei Polōketi.

O lenei lava Polōketi o lo’o galulue va’ava’alua ai le Fa’alapotopotoga o Fa’asao Fa’avāomālō ma nisi o Matāgaluega e pei o le Matāgaluega o Fa’ato’aga ma Faigāfaiva, Matāgaluega o Puna’oa Fa’alenatura ma le Si’osi’omaga fa’atasi ai ma le fesoasoani a le tele o ā latou pa’aga mai fafo.

Na fa’amanino e le afioga iā Leausalilo le tāua o ‘amu ma ‘ā’au i le si’osi’omaga aemaise le ola fa’alenatura o le tagata soifua, latou te puipuia gataifale ma matāfaga mai galu mālolosi, fa’atumauina le lelei o faigāfaiva, aemaise o tamāo’āiga maua mo tatou tagata.

O le ala lea ua matuā mana’omia ai le toe totōina o ‘amu.

E tāua le galulue fa’atasi e le gata mo Matāgaluega ma Fa’alapotopotoga ae fa’apea fo’i i tua i nu’u ma alalafaga, ina ia mafai ona tino lenei fuafuaga mo se lumana’i manuia o le atunu’u ma ona tagata.

Tusia e: Katherine Matuauto

ATA: Savali Newspaper.