Fa’atūmauina pea le nofoa ‘o Sāfata 2 ‘e le Afioga ‘iā Tuia Pu’a Fuatogi Letoa

‘I le māe’a ai ‘o le faigā pālota la’ititi ‘a le itūmālō Sāfata 2 ‘i le fa’aī’uga ‘o le vaiaso talu ai, ‘ua toe fa’atūmauina ai le nofoa ‘o le itūmālō ‘e le Afioga ‘iā Tuia Pu’a Fuatogi Letoa.

‘O le Afioga ‘iā Tuia na pale mai ‘i le faigā filifiliga tele ‘a le atunu’u ‘i le Aso 29 ‘o ‘Aukuso 2025 ‘i le vāega fa’a’upufai ‘a le HRPP, ‘ae peita’i ‘i le Aso 26 ‘o Mē 2026 na fa’amāvae āloa’ia mai ai ‘i le HRPP, ‘ae āga’i ‘e tauvā ‘i lalo ‘o le fu’a ‘a le FAST ‘ina ‘ua fa’aīloa ‘e le Afioga ‘i le Ali’i Faipule, le finagalo ‘ua ‘autasi ai lona itūmālō, ‘ina ‘ia fa’ase’e ‘e lagolago ‘i le faigāmālō ‘o lo’o tūmālō ‘i le taimi nei.

‘O le ī’uga āloa’ia ‘o le pālota la’ititi na fa’asilasila fa’alaua’itele ‘e le ‘Ōfisa ‘o le Komesina ‘o Faigāpālota (OEC) ‘i le Aso To’ona’i, na manumālō ai le Afioga ‘iā Tuia ‘i pālota ‘e 891. ‘O le Afioga ‘iā Leleua Suataga Aso (Independent), na mauaina pālota ‘e 567, ‘ae ‘o le Afioga ‘iā Toleafoa Losalia Sagalala Niumata (Independent) na mauaina pālota ‘e 109.

‘O le āofa’i ‘o le ‘au pālota ‘a Sāfata 2 na āgava’a ‘e pālota ‘e 1920. ‘Ae na fa’asilasila ‘e le OEC, ‘e na’o le 1571 pālota na fa’atinoina ‘i lenei pālota, ‘e tusa lea ma le 82%.

‘O se tusituisga ‘a le Afioga ‘i le Ali’i Faipule filifilia ‘iā Tuia ‘i le afiafi ‘o le Aso Sā, na momoli ai lona agaga fa’afetai ‘i lona itūmālō ‘ona ‘o le ī’uga sa iai le pālota.

UA MALIE O, UA MALIE FA’ASAO

Lo’u agaga e, ia faamanu a’e i le Alii, o mea uma fo’i o i totonu ia te a’u ia faamanu atu i lona suafa Paia.

Ae ou te le’i fuatia le soliga i le tiaseu i Lagi, e ao lava ona ou siligia le sili’aga i le maota i Togamau ne’i mea ane ua sopo uto sa’u tala pe sosopo fo’i le manuvale ae o ala le mafua alii i le faasausauga ia Samoa le atunuu mamala. Tulou, tulouga lava.

O paia ma mamalu o le susu i Ta’ita’i ma le mamalu o le Aufaigaluega a le Atua. O le a taalolo, tulou.

O paia faale-Malo i le afifio o lona tafatolu, o le a talolo, tulou. O ou paia faale-Atunuu o le a taalolo, tulou.

Ae o le a faapito augafa ia sa’u faamatalaga, ou te vaisausauina ai le paia le popo ma le pa e le solo, ae o mamalu taopapa o lo’u itumalo pele o Safata 2, i ona paia faale-Atua, i le susu o lau Susuga i le Toea’ina Malolo ia Kereta Fuafiva, lau Susuga i le Toea’ina Taei Ti’eti’e, lau Afioga Patele ma le paia lasilasi o le aufaigaluega a le Atua i Safata 2, tulou.

Ou te mata’utia faatulou fo’i i le paia maualuga i le Aiga Satunumafono i le Afifio o le Falefa o le Ulugatagifa, afio lau Afioga i le Faaululuga ma le Faasuaga a le aiga, afifio Tapaau tausi o le Itumalo, alalata’i Taulauniu ma Aitutagata ma le nofoa Tula ia Safata ma upu ia te oe le Alataua. Tulou.

Ae ou te le’i savalia la matafanua o Togamau ma ona Tua, i le amata atu i Niusuatia-le-manu se ia paia Niualama, ou te muamua ona ou faatulou Tulou, tulouga lava.

Safata 2, e le faigofie i lo’u tagata ona tau saili se lauie mai le aiga i le tai e fatu ai se matalalaga aua se ie se’ese’e lau tapua’iga. Ua su’egata fo’i se faataa se’i tau fili ai se motuga afa, e fatu ai se fatugagana ou te saafi talatala ai aua lau tapua’iga Safata 2 lea ua a’e manuia. Tulou.

Safata 2, e muamua lava ona ou faamalulu ma asuasu atu vaimalu i pu’ega, pe afai ua ou le asiasi atu i o outou maota ma laoa. O le agaga maualalo lava, ina ia faa’agaga o outou apitaga, e ulufale atu iai le Faaululuga ia Toleafoa Niumata ma le fetalaiga ia Leleua Suataga, ae o a’u ou te faatafatafa faatama o le ala, aua e faigata lau filiga moepo moeao e le faatauanauina.

O le ala lava lea na le faia ai se Komiti, ina ia ‘aua lava ne’i faalavelave i lau filiga sa’oloto ma ia taataa mama le faatamasoaliiga pii le campaign i ni faiga faaalatua ma fa’aaloalo i tulafono o faiga palota, ina ia maua se palota filemu ma le fiafia.

Ae peita’i o lele ua ta i le ova ma faaaloalogia le tofa faalele a le Aiga Satunumafono, ma amanaia lo’u sulusulu faateine o le po ma lo’u faatafa faatama o le ala. Faafetai.

Le Aufaigaluega e, a le Atua ua a’e manuia faiva o lou to’o o le tuli ma taula ma momoli tatalo aua lo matou alo faiva. Faafetai, faafetai tele lava.

Safata 2, ua e ta i le ova. Ua e folasia fo’i i le malae i Togamau le ie avaga o le tamaita’i, lele ua ou sapi ai i ta’aga aua upufai o Malo. Faafetai faafetai faafetai tele lava……

Tupu ma e’e ma tamafanau a Safata 2 o loo afifio I itu e fia o le kelope, ua e sii a’u i le malele.Faafetai le manatu mai, faafetai le alofa, ua le ‘ole lea. Faafetai faafetai tele lava.

Lo’u nuu o Vaie’e, o lele ua tu ma lelea le ao, ua matafi ai ao o le lagi ae tilofia ma folasia i le malae i Togamau i’a sa o lau faatamasoali’iga, Lele ua pati ma po Samoa aua ua atagia le loto e tasi ma le tutu faatasi o le tatou nuu. Aua e iloagofie le suli moni o Vaie’e i aso faapenei. Faafetai le lotonuu, faafetai le faaeaea. Lo outou aiga Sa Te’o ma tamafanau a le tatou nuu o afifio ma papa-aao i atunuu e mamao, faamalo fai o le faiva, faafetai le alofa.

Lau Susuga i le Laaulialemalietoa o le Ta’ita’i o le Vaega Faaupufai a le FAST, o le Palemia o Samoa, faafetai i le au lagolago a le FAST i ona Tupu ma E’e, faapea Tula toa ma le Aufueloloa o Samoa, se faamalo le alofa, faafetai le lagolago mai. O lau pule lea.

E momoli atu fo’i le faamalo i le Afioga i le Faaululuga ia Toleafoa Rosalia ma le fetalaiga ia Leleua Suataga, faamalo le taaalo faatamalii. O le upu lava a le atunuu, e taaalo lava tama ae o le uso. Faafetai ua malo le faatamalii.

Lo’u aigapotopoto ma o’u gafa tautupu, uo ma e masani, se ua faafetai le faaeaea, ua faamalo le loto aiga ma le fai uo moni. Faafetai faafetai tele lava.

O le mea lea avea ai lenei avanoa i luga o lenei itulau e faailoa atu ai le agaga faafetai mai lo’u tagata ma le tina o le aiga ma le fanau, faapea le aigapotopoto i Togamau, e matou te faapea atu ai, faafetai, faafetai, faafetai tele lava.

O la’u tatalo ia tumau pea le filemu o Samoa e afua mai I Ta’ita’i o le atunuu, aua e afua mai mauga manuia o Malo.

O la’u Agavatau; “O A’U MO LO’U ITUMALO, O LO’U ITUMALO MO A’U. IA FAI SE TINO O LAU TALA.”

Manuia sauniga o le Sapati.

Tuia Pu’a Fuatogi Letoa o la outou auauna

IMAGE/ATA: Tuia Pua Letoa Facebook