LISTEN

Fa’atautoga mo le tauaofiaga lona XVIII a le Fono Aoao Faitulafono a Samoa

by | Sep 16, 2025 | Sāmoa

Ua taunu’u, ma ua i’u manuia le ulua’i tauaofiaga lona 18 a le Fono Aoao Faitulafono a le Mālō Tuto’atasi o Samoa.

O le taeao o le asō, na fa’atautō uma ai Sui Mamalu po’o Faipule mai Itumālō Palota e 51 ua filifilia mai le Faigā Palota Aoao a le atunu’u na fa’ataunu’uina i le Aso Faraile, 29 Aokuso 2025.

O lenei sauniga tele, ua fa’amautūina ai, le avea aloā’ia o le Vaega Fa’a’upufai a le Fa’atuatua i le Atua Samoa ua Tasi [F.A.S.T.] ma Faigāmālō Fou, latou te ta’ita’ia le sā folau o Samoa i lenei paeā’iga lima tausaga, ma ua suia ai ma le Ta’ita’i o le Mālō, mai le afioga i le Sa’o Fa’apito iā Fiame Naomi Mataafa i le susuga i le La’aulialemalietoa Leuatea Polāta’ivao Fosi.

O le sauniga i le taeao nei, na ta’ita’ia le sauniga lotu e le susuga i le Fa’afeagaiga o le Ekalesia Fa’apotopotoga Kerisiano i Samoa mai le afio’aga o Sasina, Savai’i iā Rev. Panapa Fata To’o a’o le lagiina o vi’iga o le Atua na tapenaina lea e le Ofisa o le Failautusi a le Fono Aoao Faitulafono a Samoa.

Ina ua talia e Lana Afioga i le Ao Mamalu o le Mālō Tuto’atasi o Samoa iā Tuimaleali’ifano Va’aletoa Suālauvī II tusi tofiga mo le fa’amaonia o tofiga o Sui Mamalu o le Palemene, ma na mua’i fa’atautōina ai le afioga i le Fofoga Fetalai fou o le Fono Aoao Faitulafono a Samoa iā ‘Au’apaʻau Mulipola Aloitafua a’o le Sui Fofoga Fetalai le afioga iā Afamasaga Leone Mati Masame.

A’o Sui Faipule mai Itumālō Palota e 51 ua filifilia ai i latou nei;

  • Vaimauga #1: Pauga Teomatavui Talalelei Pauga
  • Vaimauga #2: Lenata’i Victor Fa’afo’i Tamapua
  • Vaimauga #3: Taioali’iseu Fiti Aimaasu
  • Vaimauga #4: Lima Graeme Tualaulelei
  • Faleata #1: Faumuina Opapo Soana’i Oeti
  • Faleata #2: Leatinu’u Wayne So’oialo
  • Faleata #3: Lealailepule Rimoni Aiafi
  • Faleata #4: Ale Vena Ale
  • Sagaga #1: Loau Solamalemalo Keneti Sio
  • Sagaga #2: Fata Ryan Schuster
  • Sagaga #3: Salā Paulo Tuala Poto
  • Sagaga #4: Lefue Pelenise Lelevaga
  • Aana Alofi #1: Fesola’i Apulu Tusi’upu Tuigamala
  • Aana Alofi #2: Aiono Alec Ekeroma
  • Aana Alofi #3: Agaseata Tanuvasa Valelio Tanuvasa Peto
  • Aana Alofi #4: Afamasaga Leone Mati Vaili Masame
  • Aiga i le Tai: ‘Au’apa’au Mulipola Aloitafua Mulipola
  • Falelatai ma Samatau: Lupematasila Lavea Galumalemana Tologatā
  • Lefaga ma Falese’elā: Masinalupe Leatuavao Makesi Pisi
  • Safata #1: Seve Te’i Fuimaono
  • Safata #2: Tuiā Pu’a Fuatogi Letoa
  • Siumu: Fa’alogo Asuao Kapeliele II Fa’alogo
  • Falealili #1: Toelupe Maoiautele Poumulinuku Onesemo
  • Falealili #2: Fuimaono Maiava Tito Asafo
  • Lotofaga: Fiame Naomi Mataafa
  • Lepā: Tuila’epa Lupesoli’ai Sa’ilele Malielegaoi
  • Aleipata Itupā i Luga: Taufua Edmund Taufua
  • Aleipata Itupā i Lalo: Faleomavaega Titimaea Tafua
  • Va’a o Fonotī: Mau’u Ati’ifale Siaosi Pu’epu’emai
  • Anoāma’a #1: Moefa’auouo Julius Ah Kui Tafuna’i
  • Anoāma’a #2: Lauofo Fonotoe Nuafesili Pierre Lauofo
  • Fa’asaleleaga #1: Leatigaga Matafai Lauina Iiga
  • Fa’asaleleaga #2: Va’aelua Senetenari Samau
  • Fa’asaleleaga #3: Namulau’ulu Papāli’i Leota Sami Leota
  • Fa’asaleleaga #4: Tea To’oala Peato
  • Fa’asaleleaga #5: Vui Iiga Sione Iiga
  • Gagaemauga #1: Va’aaoao Salumalo Alofipo
  • Gagaemauga #2: Seuamuli Fasi Toma
  • Gagaifomauga #1: Lavea Solomona Paulo
  • Gagaifomauga #2: Foisala Lilo Tu’u Ioane
  • Gagaifomauga #3: La’aulialemalietoa Polāta’ivao Fosi
  • Vaisigano #1: Amituana’i Malolo Tautofi Roma
  • Vaisigano #2: Motuopua’a Seve Henny Afereti Papāli’i
  • Faleālupo: ‘Ae’au Tima Le’avaise’etā
  • Alataua Sisifo: Taitu’ave Lafaitele Valo’aga Ta’aititi Iona
  • Salega #1: Tilafono David Hunter
  • Salega #2: Leilua Sagato Karene
  • Palauli #1: Mulipola Anarosa ‘Ale – Molio’o
  • Palauli #2: Fiu Fa’aolatane Ponifasio Vasa
  • Satupa’itea: Asiata Tavu’i Tafu Salevao
  • Palauli #3: Aiolupotea Misa Tony Aiolupo

I lea 51 nofoa o Faipule o le Palemene, e 31 nofoa ua manumālō mai ai Sui Mamalu o le Vaega Fa’a’upufai a le F.A.S.T. o le isi 14 nofoa o Faipule ua manumālō ai le Vaega Fa’a’upufaia e Puipuia Aiā Tatau a Tagata [H.R.P.P.], o le 3 o nofoa o Faipule ua manumālō mai ai Sui o le Vaega Fa’a’upufai a le Samoa Ua Potopoto [S.U.P.] ma le 3 o nofoa o Faipule ua manumālō ai Sui Tauvā Tuto’atasi.

I le mae’a o le Fa’atautoga Aloā’ia i le asō, ua na’o le F.A.S.T. ma le H.R.P.P. ua avea o ni Vaega Fa’a’upufai e aloā’ia i totonu o le Palemene, ma o le susuga iā Tuila’epa Lupesoli’ai Sailele Malielegaoi o le Ta’ita’i o le Itu e Agaia le Mālō Filifilia a le F.A.S.T. o lo’o ta’ita’ia e le afioga i le Palemia iā La’aulialemalietoa Leuatea Polāta’ivao Fosi.

O Sui o le S.U.P. e pei ona ta’ita’ia e le Palemia ua mavae atu nei, iā Fiame Naomi Mataafa, o le ā avea i latou o ni Sui Tuto’atasi mo lenei Paeā’iga ma ua atoa i ai le to’a6 o Faipule Tuto’atasi i totonu o le Palemene o Samoa mo lenei nofoā’iga lona 18.

Na auai le afioga i le Kovana Sili o Amerika Samoa, le Peresetene fa’apea le mamalu o le Mālō o Tutuila ma Manu’a e molimauina lenei aso tāua mo Samoa ma ona ‘upufai.

Tusia: Pesetā Tusiga Taofiga (Savali Newspaper)

ATA: Vaitogi Asuisui Matafeo, Pesetā Tusiga Taofiga (Savali Newspaper).