Fa’atautō le Afioga ‘iā Vui Clarence Nelson ‘e fa’auluulu ‘iai le ‘Ōfisa ‘o Sulufa’iga

‘O se sauniga mamalu ma le matagōfie na fa’atautaia ‘i le aso ananafi ‘i le ‘Ōfisa ‘o Fa’amasinoga, ‘e fa’atautōina ai le Afioga ‘iā Vui Clarence Nelson, lea ‘ua ‘avea nei ma fa’auluuluga ‘o le ‘Ōfisa ‘o Sulufa’iga.

‘O se tasi nei ‘o fa’alāpotopotoga pito ‘i tāua ‘i le mālō ‘e pei ‘ona fa’ailoa ‘e le Afioga ‘i le Ta’ita’i ‘o le atunu’u, le telē ‘o le a’afiaga ‘ua iai nei alo ma fānau lāiti ‘a le atunu’u, ‘aemaise ‘i le itū ‘o sauaga matagā ‘e fa’atino ‘ia ‘i lātou, ‘i le o’o ai lea ‘i se ogaoga ‘e lē tatau ‘ona iai ‘i nisi ‘o fānau, ‘e a’afia mai ‘i so’otaga vāvālalata ‘i totonu ‘o ‘āiga.

‘O le fa’atautōga ‘a le Afioga ‘ia Vui ‘ua ia fa’ailoa ai lona atugaluga, ‘e fa’atatau ‘i fa’amatalaga ‘o lo’o tu’uina ‘i luga ‘o ‘upega tafa’ilagi, ‘e fa’alauiloa ai ‘i alo ma fānau tūlaga ‘e a’afia ai ‘i lātou. ‘O se gaioiga ‘ua tatau ‘ona silasila toto’a ‘iai, ‘ona ‘e sili atu le ogaoga ‘o a’afiaga ‘e fa’amauina, ‘i le loto ma le māfaufau ‘o le tagata ‘ua a’afia, nai lo’o se manu’a ‘i le tino.

‘O le Afioga ‘ia Vui na a’oa’oina mai le Kolisi ‘o le Sagato Iōsefo ‘i Alafua, ma fa’asolo atu ai ‘i nisi ‘o iunivesitē maualuluga ‘i Niu Sila, ‘a’o le tausaga 1979, na toe taliu mai ai ‘i le atunu’u ma galue ai ‘o se lōia ‘i le ‘Ōfisa ‘o le Lōia Sili. ‘O le tausaga ‘e 2000 na tōfia ai loa, ‘o se fa’amasino ‘o le Fa’amasinoga Fa’aitūmālō, ma fa’aauau ai lana ‘au’aunaga se’i o’o ‘ina tōfia ‘o se tasi ‘o fa’amasino sīnia ‘o le Fa’amasinoga Fa’aitūmālō ‘i le tausaga 2001. Na fa’aauau lana tautua ‘i le Fa’amasinoga Maualuga ‘i le tausaga 2006, ‘a’o le 2019 na fa’ase’e ane ai na te tau’aveina le nofoa ‘o le Fa’amasino Sili ‘ina ‘ua mālōlō retire le Afioga ‘iā Pātū Tiāva’asu’e Falefatu Sāpolu, ‘e tālia ai le tōfia aloa’ia ‘o se Fa’amasino Sili fou. Mai le māe’a ai ‘o le 26 tausaga ‘o lana tautua, na mālōlō retire ai ‘i le tausaga ‘ua mavae se’ia toe vala’au mo le tofiga ‘ua fa’ae’e atu nei ‘ia te ia ‘e le ‘Ōfisa ‘o Sulufa’iga.

IMAGE/ATA: Government of Samoa