Fa’asoa le Afioga ‘i le Minisita Laga’aia ‘e mōmoli le sao ‘a Sāmoa ‘i le fonotaga ‘a le CSW69 ‘i ‘Āmerika

‘O le vaiaso nei ‘o lo’o iai ‘i le Iunaite Setete ‘o Āmerika le faigāmalaga ‘o lo’o ta’itā’ia ‘e le Afioga ‘i le Minisita Hon. Laga’aia Ti’atu’au Tufuga, ma sui ‘o le Matāgaluega ‘o Tinā ma Tama’ita’i, Ātina’e ‘o Nu’u ma Agafeso’ota’i mō le fonotaga lona 69 ‘o le Kōmisi ‘i le Tūlaga ‘o Tinā ma Tama’ita’i (Commission on Status of Women).

‘I se fa’asoa ‘a le Afioga ‘i le Minisita ‘i le asō, na ia fōfola ai se sao ‘a Sāmoa ‘i le matā’upu ‘o le Poto ma le Ta’itā’iga (Wisdom & Leadership), ‘e fatufatu ai se manatu lautele, ‘auā le fō’ia ai ‘o fa’afitāuli ‘o lo’o feagai ma Tinā ma Tama’ita’i, ‘ae fa’apea fo’i ‘i lō tatou atunu’u.

Na saunoa Laga’aia, “‘Ou te iloa ‘ou te fou mai ‘i lenei matāfaioi, ‘ae ‘ou te fa’afetai ‘i le Atua mō mea ‘uma. ‘E to’atolu la’u fānau teine, ma le to’atele ‘o fānau ‘a fānau. ‘Ou te lē tau va’ai māmao, ‘ou te iloa ai le tāua ‘o le galuega ‘a le Matāgaluega ‘a Tinā ma Tama’ita’i.”

‘O le tūlaga ‘o lo’o iai le lalolagi ‘i aso nei, ‘e lē faigōfie. ‘Ua galo ‘i tagata le ‘auala ‘e tautala ai ma le agalelei, ‘ua galo fo’i le uiga ‘o le alofa.

‘O le tatou fa’asāmoa, ‘e fa’atatau ‘i le alofa, fa’aaloalo, ma lau gagana, ‘e ‘ese ma le tāua tele. ‘Ae ‘o se fa’anoanoāga ‘i le va’ai atu ‘i le tūlaga ‘ua iai le sauāina ‘o tagata ‘i lenei taimi, ‘e o’o lava ‘i ‘upegatafa’ilagi.

‘E tāua lenei fonotaga, ‘ina ‘ia a’oa’oina, mā sā’ilia ai ‘auala ‘e tāofi ai nei āmioga (sauāga). ‘Ou te lē mana’o lava ‘e ola a’e fānau ‘a la’u fānau, ‘i se si’osi’omaga fa’apenei.

‘Ua toe fa’amanatu mai ‘e le Afioga ‘i le Minisita ‘iā Laga’aia le tūlaga tutusa ‘o ali’i ma tamaitai ‘e maua’a ‘i le fa’aaloalo, ‘onosa’i, ma le alofa, ‘o tūlaga nei ‘e fa’amatalaina ai lō tatou fa’asinomaga.

‘I totonu ‘o Sāmoa, ‘e tatau ‘ona tatou ta’ita’i ma le agalelei, tautala ma le fa’aaloalo, ma tēte’e atu i so’o se itū’aiga ‘o sauāga.

Saunoa Laga’aia, “Pō ‘o le ā lava, ‘e i ai lava le ‘auala, ma ‘āfai ‘e lē mafai ‘ona ‘e agalelei atu, tāofi, ‘aua ‘e te tū ‘i luga pē ‘āfai ‘o le ‘a ‘e sauāina se tasi, ‘ae ‘ia ‘e faʻatali se’ia ‘e sāuni e tautala ma le agalelei.”

Sā ia fa’amamāfaina fo’i le tatau lea ‘ona fō’ia ‘o nei fa’afitauli a’o lāiti, ‘e ātagia ai le fa’alauiloaina talu ai nei ‘o le ECD Framework ma le tāua tele ‘o le ‘āmata mai ‘i fānau, ‘ina ‘ia lelei le a’oa’oina ‘o i lātou, ‘ae ‘e tatau lava ‘i mātua ‘ona faia le fa’ata’ita’iga.

‘O se vala’au mālosi lea ‘e si’itia ai ā tatou ‘upu, puipuia ā tatou āmioga, ma olaola ō tatou nu’u i le mamalu ma le fa’aaloalo.

ATA: MWSD