Fa’ameaalofa ‘e le Mālō ‘o Iapani le USD $30,000 mo le fausiaina ‘o fale ā’oga ‘a le ā’oga tūlaga lua ‘a Faleāse’elā ‘i Lefaga

‘O lo’o fa’amauina pea le fa’aauau ai ‘o le fesoasoani ‘a le mālō ‘o Iapani ‘i Sāmoa, talu ‘ona si’ilima ‘e ‘avea ‘o se pā’aga ‘a lo tātou atunu’u, ‘i le ūna’ina ‘o lona tamao’āiga, ‘o ātina’e, itū tau soifua mālōlōina ‘aemaise ‘i le itū tau a’oa’oga.

Lea fo’i ‘ua toe ofo mai leisi ana fesoasoani ‘e silia ‘i le $30,000 ‘Amerika ‘e fesoasoani atu ai ‘i le toe fausia ‘o nisi potu ā’oga fa’aopoopo ‘i le ā’oga tūlaga lua ‘a Faleāse’elā ‘i Lefaga. ‘O se fiafiaga ‘i le afioga ‘i le Ali’i Pule, ‘ina ‘ua tali atu le mālō ‘o Iapani ‘i le mana’oga sa pito ‘i sili ‘ona mo’omia.

‘O le fa’afītāuli na iai, ‘o le si’itia ‘o le fuainūmera ‘o alo ma fānau resitala ‘ae pū mo’omo’o ma ‘ua lē saogalēmū le si’osi’omaga ‘o alo ma fānau ‘i totonu ‘o se potu ‘e tasi. Ma ‘o se tasi lea ‘o fa’afītāuli na poloka ai le talosaga ‘e mo’omia nisi faia’oga fa’aopoopo ‘ona ‘o le tūlaga ‘i potu ā’oga ‘e lē lava. Ma ‘ua o’o atu nei le faitau aofa’i ‘o alo ma fānau ‘i lea ā’oga ‘i le silia ma le 200. 

IMAGE/ATA: Savali Newspaper.