Fa’amatalaga Aloā’ia mai le Pālemia Hon. Fiame Naomi Matā’afa, 14 Ianuari 2025

Ou te faatalofa atu i le paia o si o tatou atunuu. O lenei ua tatou i ai i le vaiaso lona lua o la tatou malaga o lenei tausaga fou – 2025. Malo le faatoatoa i galuega o lenei aso.

O paia faale-malo, paia faale-ekalesia, ma paia faale-atunuu, o le a nu’unu’u atu faatini o tausala, auā o Samoa ua maea ona tofi.

E le o toe po se lilo i le faafofoga a le atunuu i le mataupu e uiga i le faasalalau faalaua’itele ai o moliaga o le afioga ia Laauli Leuatea Polataivao Fosi i le Aso Faraile, 3 Ianuari 2025. Ma sa tuuina atu ai la’u faasalalauga muamua i lea lava aso, i le faatauaina o le mulimulitaia o le faasinomaga a le Tulafono, atoa ai ma auala o loo aiaia ai faatinoga uma faaletulafono o mataupu faapenei.

O le Aso Faraile na te’a nei, Aso 10 o Ianuari 2025, na tuuina atu ai le faasalalauga faalaua’itele mai ia te au nei o le Palemia, i le faamutaina o le tofiga o le Minisita o Faatoaga ma Faigafaiva sa tauaveina e le afioga i a Laauli e afua atu i le ta o le 5pm i le afiafi lava lea.

O le mataupu o loo ave sese ma faanenefu ai le maitau a le toatele, ona o faamatalaga salatua i luga o upega tafa’ilagi, e faapea ua molia le afioga ia Laauli i le maliu ai o Tu’u’au Maletino. E ao ona faailoa manino mo le silafia e le atunuu, e leai e lē o lena. O le mataupu ma le su’esu’ega o le maliu o Tuuau Maletino o lo’o matala pea, ma o lo’o fa’aauau su’esu’ega o faamatalaga uma e le Matagaluega o Leoleo.

Peitai o moliaga faasaga ia Laauli ma i latou e toa 5 na molia muamua, e faatatau i tuuaiga e fanau mai i ni taupulepulega e molia se tagata e faapea na maliu ai Tuuau Maletino ma le faia o fa’amatalaga e lepeti ai le nofo filemu. O nei moliaga e aofia ai le;

1. Taupulepule leaga e faaliliu ese le faamasinoga amiotonu (3 moliaga)
2. Tala pepelo fatu fua i le faiga o faamatalaga molimau
3. O le faasoesa e faaaogaina ai ala tau fesootaiga faaeleteroni
4. Faamatalaga sese ua mafua ai le faaleagaina o le tauleleia o le igoa o se tagata (3 moliaga)
5. Faia o faamatalaga poo upu taufaaleaga ma le faamoemoe e lepeti ai le filemu (2 moliaga)

O le faagasolo o lenei mataupu i le Faamasinoga, o le mapusaga lea e sailia ai le amiotonu. Ma o le Faamasinoga na te iloiloina toto’a mau uma e fitoitonu i lenei mataupu, atoa ai ma se faaiuga. Ma e tumau pea le mau faa-le-tulafono, e tauave pea le amiotonu o le tagata se’i vagana ua faamaonia lana solitulafono.

Ae peitai, o aafiaga o le Malo i le faatulai mai o moliaga o le afioga ia La’auli, e le māmā ia te a’u nei o le Palemia. Aemaise i le tausisia o le anava o le Faigamalo a le FAST, ina ia tausisia ma taunapo i le malu o le Tulafono. I lo’u agaga fetāla’i fa’ata’ita’i o le Malo, sa ou fautuaina le afioga i a Laauli ina ia faamavae mai lona tofiga. Ma e lē fou lea tulaga i faigamalo faatemokarasi, mo i latou o loo tauaveina tofiga taualoa o se Malo, pe afai ua i ai ni tulaga e tilofia ai ma ua ōia ai le tausia o le amio sa’o ma le tauleleia o le tofiga, aemaise le Kapeneta ma le Pule Faatonu.

E le fou foi i le afioga ia Laauli le filifiliga o le faamavae. O le aso 23 Aokuso 2017 sa tuuina atu ai e Laauli lana faamavaega mai le tofiga o le Minisita o Faatoaga ma Faigafaiva, i lē sa avea ma Palemia i lena vaitau – le Susuga i a Tuilaepa, ina ua faatula’i ni moliaga faasaga ia te ia. Peitai, i le mataupu lenei, e le’i taliaina e Laauli lona faamavae mai le tofiga Minisita. Ma taunuu ai loa i la’u faaiuga e faamuta lona tofiga e tusa ma le Mataupu 33(3)(e) o le Faavae.

I le afua mai o lenei mataupu, ua tulai mai ai se fesili i le faatuatuaina o a’u nei o le Palemia i le taitaiga o le Malo. Ua lagalagā ai finagalo o nisi o Faipule o le Vaega Faaupufai a le FAST, o i latou o loo lagolagoina Laauli. A o le faasinomaga a le Faavae o le Malo Tutoatasi o Samoa, i le tofiaina o Minisita o le Kapeneta o loo aiaia i le Mataupu 32(2)(e). Ma e i ai lea i le Palemia.

I lea tulaga, sa faataunuu ai a matou feiloaiga ma Minisita o le Kapeneta i le aso ananafi, e uiga i le mataupu o le faatuatuaina o a’u nei o le Palemia e Minisita o le Kapeneta, atoa ma lo’u foi faatuatuaina o Minisita o le Kapeneta e faaauau ai le galuega faa-le-kapeneta i lalo o la’u taitaiga. Ma i le faaiuina o nei feiloaiga, ua ou taunu’u ai i la’u faaiuga e faamuta (terminate) le tofiga o le afioga ia Mulipola Anarosa Ale Molio’o, o le Minisita o Tina ma Tamaitai, faamuta le tofiga o le afioga ia Leota Laki Lamositele o le Minisita o Pisinisi, Alamanuia ma Leipa, ma le faamutaina o le tofiga o le afioga ia Toelupe Poumulinuku Onesemo, o le Minisita o Fesootaiga ma Faamatalaga Tekonolosi.

E tauave pea e le faigamalo le mau faaletulafono ‘e leai se tasi e i luga atu o le Tulafono’ ma e lē avea tofiga taualoa po’o nisi mafua’aga, e suia ai le ala o le Tulafono atoa ai ma taualumaga o galuega a le Faamasinoga i ni mataupu e molia ai se tasi o loo ia umia tofiga taualoa o le Malo. O lo tatou tausisia o le ala o mea ma le faatonufolau a le Tulafono, o lo tatou aputiputiina lava lea o pulega lelei, faamaninoina o mataupu, ma le mafai ona tali atu. O poutu ia o so’o se faigamalo e mulimulita’i i le malu o le Tulafono ma faiga faavae o loo faatino ai ana galuega.

I le maitau i ai i le tutupu mai o luita’u tau i faigamalo i si o tatou atunuu, ua alia’e ai aafiaga o le Pulega Faatonu, o le Faamasinoga, le Palemene, atoa ai ma itutino e faalagolago i ai le Malo i le faatinoina ma le faamamaluina o le Tulafono, e pei o le Matagaluega o Leoleo. Ua i ai se vaaiga, ua fetosoaina itu mavae o le tafatolu i le pule faapolokiki aemaise i ni faiga faaala tua, ae ua tauau ina faatuatuana’i le pule a le Tulafono.

O vala faigata ia, ma afai e le galulue faatasi Taitai o le atunuu ma itutino uma o le Malo, e taulamua i le usitaia o le Tulafono ma ala o loo faatino ai, ona masofa lea o le fa, ma fanau mai ai lu’itau ogaoga sa feagai ma o lo’o feagai pea ma le tatou Malo Tutoatasi. O le feitaga’i ma le loto taui masui o ni uiga ua lanu ai a tatou upu fai.

E faapea foi se vaaiga i le aafia o le aufaigaluega a le Malo i feteenaiga ma le fetosoaiga o le pule faapolokiki, ma tauau ai ina nunu le to’au, i le faatinoina o galuega mo le tautuaina o le atunuu. O Vaega Faaupufai, o se fola e mafai ai ona faagaoioi faigamalo e tulai mai e tautua le atunuu. Ae lē avea faiga vaega faaupufa’i, e taitai fa’ai’a mātau ai le aufaigaluega mai le faatinoina o a latou galuega e tusa ma le faasinomaga o Tulafono, ma faiga faavae a le Malo. O le ala lea, e fesuia’i ai Taitai e filifili mai e le atunuu mai lea taimi i lea taimi, atoa ai ma Vaega Faaupufai e taitaia le Malo, ae tumau pea le aufaigaluega a le Malo, e faaauau le galuega auauna mo le atunuu.

Le aufaigaluega e a le Malo, ia faaauau pea le galuega ma ia mapo la tatou tautua mo si o tatou atunuu. Manatua, o la tatou tautoga i luma o le Atua, tatou te tautua ma le faamaoni e ala i le faasinomaga a le Tulafono, ma faiga faavae a le Malo. Ae sili ona tatou saili i le Atua, e va’atele i ai a tatou faatinoga uma.

O a pefea e tulai mai ona o mau ese’ese i finagalo o Faipule, o loo iai lava matafaioi tauave fa’ale-tulafono ma ala o mea i tofi e aafia ai, e faataunu’u ai i ni fa’aiuga. O nisi o ia faaiuga lea ua maea ona faia e pei ona otooto atu i luga.

O le faatuatuaina po’o le lē faatuatuaina o la’u taitaiga fa’a-Palemia e filifili iai le Palemene o Samoa, e le faia e le vaega faaupufai. E iai foi aiaiga fa’ale-Fa’avae ma ala o mea o lena laasaga, ma ua ou nofo sauni iai e fai i lumamea o le Maota Fono o Samoa.

Ia mau pea le to’ovae, le onosai ma le faapalepale, o le tofa saili ma le faautaga i taitai filifilia o le atunu’u e taatia mai iai taunuuga o lenei mataupu.

O le tatalo, ia faaloaloa mai pea aao alofa o le Atua i luga o Samoa ma aumai lona toafilemu ma le manino e foe ai le tatou sā folau.

Ia manuia lau tapuaiga Samoa.

SOIFUA.

ATA: Government of Sāmoa.