Fa’amāonia mai le ‘Ōfisa ‘o le Palemia ma le Kapeneta tala sesē ‘i le malaga fa’atasi ai ‘o le Afioga ‘i le Palemia ma lona alo

‘O le pepa ‘o fa’amatalaga ‘ua tali mai ai le ‘Ōfisa ‘o le Palemia ma le Kapeneta, ‘e tusa ‘o nisi ‘o fa’asalalauga ‘i luga ‘o ‘upega tafa’ilagi, ‘o lo’o tā’ua ai le alu ‘o sēleni ‘a le ‘aufailāfoga ‘a le atunu’u ‘e fa’atupeina ai le malaga ‘o le alo ‘o le Afioga ‘i le Palemia ‘ia Anslem Schmidt, ‘i Niu Sila mo siaki fa’ale soifua mālōlōina ‘a le Afioga ‘i le ta’ita’i ‘o le atunu’u.

‘O nei fa’asalalauga sa tā’ua ai le totogiina ‘i sēleni ‘a le atunu’u ‘o le pāsese, nofoaga ‘e fa’amautu ai, ma nisi ‘o vāega ‘uma mo lona alo ‘ia Anslem Schmidt.

‘Ua fa’amanino mai ‘e le pepa ‘o fa’amatalaga, ‘e leai se sēleni ‘e tasi ‘a le mālō ‘o lo’o fa’aaluina na totogiina ai lona pāsese, ‘o se nofoaga na fa’amautu ai, ma nisi vāega mo’omia mo lona atali’i, sā totogi tasi lava ‘e le Afioga ‘i le Palemia po’o lona tua’ā ma lona ‘āiga.

Ma ‘ua toe fa’amanatu mai ai, ‘o se solitūlāfono le faia ‘o ni fa’amatalaga sesē ‘e ta’uleagaina ai le tamāli’i’aga ‘o seisi tagata.

IMAGE/ATA: Parliament of Samoa