Fa’amanino ‘e le Afioga ‘i le Minisitā Ale Vena Ale la’asaga ‘ua o’o ‘iai le tufaina atu ‘o le sēleni ‘a Sāfata

‘Ua fa’amaonia mai ‘e le Afioga ‘i le Minisitā ‘o le Matāgaluega ‘o Puna’oa ma Alagā’oa ma le Si’osi’omaga, le Afioga ‘Ale Vena ‘Ale, ‘ua mautinoa lava le toe palasi ‘i lalo ‘o le sēleni maua, ‘e sui ‘o le itūmālō ‘o Sāfata, na a’afia ‘i le goto ai ‘o le va’a su’esu’e ‘a le mālō ‘o Niu Sila, mai le aofa’iga sa fa’alauiloa muamua ‘e $1,100 ‘a le tagata e to’atasi, mai le tagata matua ‘e o’o atu ‘i le pepe.

‘O le āfuaga ‘o le toe palasi ai ‘o le sēleni pei ‘ona fa’amanino ‘e le Afioga ‘i le Minisitā, ‘ua toe fa’aopoopo le fuainumera ‘o tagata ‘ua lesitala ‘i le itūmālō ‘i le faitauga fa’alua, ‘a’o le faitauga muamua na manino ai le numera ‘o le sēleni lea na faitauina ‘e $1,100 ‘a le tagata. ‘A’o le toe palasi ai ‘o le fuainumera ‘o le sēleni na fa’ailoa ‘e le Afioga ‘i le Minisitā ‘e le itiiti ifo ‘i lalo ma le $800 ‘a le tagata.

‘O le faitauga muamua ‘a le itūmālō ‘e silia ma le 8,000. Peita’i ‘o le faitauga fa’alua ‘ua sili atu ma le 10,000, ma ‘e fa’aaluina ai le sēleni ‘e $11 miliona. Na fa’amanino ‘e le Afioga ‘ia ‘Ale Vena ‘Ale le $10 miliona lea mo Sāfata ma Si’umu.

‘O le $10 miliona lava latou ia mai le mālō ‘o Niu Sila, ‘ua māe’a ‘ona fa’amatu’u mai ‘i le tausaga ‘ua mavae, ‘i se talosaga na tauala atu ‘i le mālō, mo se taui tupe mo a’afiaga ‘o gata’ifale ‘o Sāfata, ‘i le goto ai ‘o le va’a su’esu’e ‘a Niu Sila.

IMAGE/ATA: Parliament of Samoa