Fa’amanatuina le 100 tausaga ‘o le Lakapī Sāmoa

‘O le taeao ‘o le Aso Lua ‘i lumāfale ‘o le Fale ‘o le Mālō ‘i Matagi-ala-lua na fa’amanatuina ai le ‘atoāga ‘o le 100 tausaga talu ‘ona fa’avae mai le Lakapī Sāmoa, po’o le Iuni Lakapī ‘a Sāmoa ‘e pei ‘ona iloa ai ‘i le tele ‘o tausaga.

‘O lenei fa’amoemoe na ‘auai atu ai le mamalu ‘i Iuni Lakapī ‘ese’ese ‘a le atunu’u mai nu’u ma alalafaga, fa’apea tama tuai ‘o le Manu Sāmoa, ta’inane alo ma tamafanau ‘o le atunu’u, e lē gata ‘i le ‘au ‘a ali’i, fa’apea ‘au ‘a tama’ita’i ‘a Sāmoa.

‘O le Afioga ‘i le Sui Pālemia, Tuala Iosefo Ponifasio sā fai ma sui ‘o le Mālō ‘e fa’afetaia le sao tāua ‘a le Lakapī Sāmoa mo le tele ‘o tausaga, ‘aemaise ‘o le tāua ‘o lenei ta’aloga ‘i le soifuaga ‘o tagata Sāmoa. Na saunoa Tuala ‘e fa’apea:

“’O le aso nei, a’o tatou fa’amanatuina ma fa’amanatu le faigamalaga ‘a lenei ta’aloga ‘i loto ma mafaufau ‘o so’o se tagata Sāmoa, ‘ua tatou potopoto ‘e momoli le fa’afetai ‘i le Atua Silisili’ese ‘ona ‘o le tele ‘o fa’amanuiaga ‘ua ia tu’uina mai ‘i lō tatou atunu’u ‘e ala ‘i lenei matāti’a tāua”.

“’O lenei fa’atasiga u’a vala’auina ai fo’i ‘i tatou ‘e toe mānatunatu ma fa’amāmalu ‘iā ‘i lātou na muamua mai ‘iā ‘i tatou—’o uluai paionia ‘o le ta’aloga, ma manatua lō latou sao na mamanuina ai le Lakapī ‘i le 100 tausaga ‘ua mavae.”

ATA: Taunuuga Toatasi / Sāvali Newspaper