Fa’amanatuina ‘e le mālō ‘o Sāmoa le aso fa’apitoa mo ali’i ma tama’ita’i malu ‘o le mālō

“Ia malu ‘i fale, ‘ia malu fo’i ‘i fafo Sāmoa,” ‘o ‘upu ia na saunoa ‘iai le Afioga ‘i le ta’ita’i ‘o le atunu’u, La’auli’alemālietoa Pōlata’ivao Fosi Schmidt, ‘i lana saunoaga ‘autū ‘e fa’amanatu ma fa’atāuaina ai le aso fa’apitoa mo ali’i ma tama’ita’i malu ‘o le mālō.

“Tātou Matāgaluega ‘o Leoleo ma Falepuipui, ‘o le tātou vala’auina lea: ‘ia malu lo tātou atunu’u ‘o Sāmoa”. Na saunoa le Afioga ‘i le Palemia ‘e fa’apea, “ ‘O se aso ‘ua ‘atofaina ‘e tātou te manatua ai, fa’amamalu ma fa’afetaia ai ali’i ma tama’ita’i leoleo sa lātou fīligā ‘i le asaina ma le tautuaina ‘o le tau’aveina ‘o tiute fa’aleoleo mo le saogalēmū ‘o Sāmoa, ‘aemaise ‘i lātou ‘ua fai’ilagi le fōlauga ‘a’o fa’atinoina ā lātou tautoga ‘e ala ‘i la lātou galuega ‘e ‘avea ma malu ‘o le mālō ‘o Sāmoa.”

‘O le galuega ‘a ali’i ma tama’ita’i leoleo ‘o lenei tausaga, fa’apea fo’i le ‘au’aunaga ‘a le falepuipui ma le toe fuata’ina, ‘o le manatua pea lea ‘o le ‘au’aunaga sa tauasaina mai ‘e tulatoa ‘o le galuega ‘i tausaga ‘ua mavae, lea ‘ua momoe mai ‘i ti’asā.

‘O lenei aso fa’amanatu ‘i lenei tausaga, sa fa’atasi ai fo’i ma leoleo mai le mālō ‘o ‘Ausetālia ma sui ‘o leoleo mai le mālō ‘o Niu Sila, ‘ona ‘o la lātou faigā pā’aga ma le ‘ōfisa ‘o leoleo ‘a Sāmoa.

IMAGE/ATA: Savali Newspaper Facebook