Fa’amālosia le tūlāfono mo le tu’uina atu ‘o fānau ‘i Ā’oga

Talu ai ‘e le’o tausisia pea lava ‘e le to’atele ‘o mātua ‘o le atunu’u le ‘auina atu ‘o fānau ‘i ā’oga, ‘ua ‘o se solitūlāfono ‘e ‘i lalo ‘o le tūlāfono 2009 vāega lua, ‘ua toe tu’uina atu ai le fa’asilasilaga ma le fa’anaunauta’iga ‘o le Matāgaluega ‘o Ā’oga, ‘o le ‘a lē toe tu’uavanoa loa ‘i mātua ‘e le ‘o usita’ia vāega ‘o le tūlāfono, ‘e aofia ai le fa’amālosia ‘o le ‘auai ‘uma ‘o fānau ‘i ā’oga ‘i taimi ā’oga mai ‘i le 4 tausaga mo ā’oga ‘āmata, 5 tausaga ‘i le 16 tausaga mō ā’oga tūlaga lua ma kolisi maualuluga.

‘O lo’o aiaia fo’i ‘i lalo ‘o lea vāega ‘o le tūlāfono, so’o se matua ‘ua lē tu’uina atu fanau ‘i ā’oga ‘ae ‘ua aulia tausaga ā’oga, ‘e mōlia ‘i lalo ‘o le tūlāfono, fa’atasi ai ma lou ‘ave’esea ‘o se tamaitiiti mai le faleā’oga ‘e aunoa ma le logoina ‘o le faiā’oga po’o le puleā’oga, ‘o se tasi lea ‘o solitūlāfono.

‘O ia vāega ‘uma, ‘o le ‘a mafai ‘ona tu’uina atu ai se fa’asalaga tupe ‘i mātua ‘e lē i lalo ifo ma le $5,000. ‘O ‘i lātou ‘o le ‘a māta’itūina ‘ia lenei tūlāfono, ‘e aofia ai sui ‘o nu’u, ‘o le Matāgaluega ‘o Leoleo ‘ātoa ai ma le sui ‘o le Matāgaluega o Ā’oga ma Aganu’u. Pe ‘a fai fo’i ‘ae fa’alavelaveina ‘e mātua le galuega ‘a ‘i lātou nei, ‘o le ‘a mafai fo’i ‘ona fa’asalaina ‘e le i lalo ifo ma le $5,000 so’o sē tasi ‘e tete’e atu ‘i le fa’atinoga ‘o ia galuega.

IMAGE/ATA: ACER News (Australia)