Fa’amālōlō lē tūmau ni tama’ita’i malu ‘o le mālō se to’alua

‘E to’alua tama’ita’i malu ‘o le mālō lea ‘ua fa’amālōlō lē tūmau ‘i le taimi nei, ‘ae fa’atino su’esu’ega loto’ifale ‘a le matāgaluega ‘i matā’upu ‘e fītō’itonu ‘i aga tausili ‘e fa’atino ai galuega ‘a ali’i ma tama’ita’i malu ‘a le mālō. ‘O ‘i lā’ua ia ‘e to’alua, ‘ua fa’asalaina nei ‘ina ‘ua o la lē usita’ia se tasi ‘o faiga fa’avae ‘a le matāgaluega, ‘e lē tatau ai ‘ona tu’uina ‘i luga ‘o ‘upega tafa’ilagi ‘e se ali’i po’o se tama’ita’i malu ‘o le mālō, ni ata ‘o ni fa’alavelave tutupu, po’o le fa’atinoina fo’i ‘o Tiktok ma nisi vāega. Na lapata’ia muamua fo’i ‘ina ‘ua la fa’atinoina se Tiktok ‘i luga ‘o ‘upega tafa’ilagi ‘a’o lā’eiina le tōniga ‘a leoleo.

‘O tama’ita’i ‘e to’alua nei ‘ua fa’asalaina ‘ina ‘ua ‘o la tu’uina ‘i luga ‘o le Api ‘o Fōliga le fa’alavelave na tūla’i mai ‘i Lepea, na so’aina ai ‘e se ta’avale se malu ‘o le mālō ‘o tiute ‘i mōlī, ‘e fa’atonutonu le gāsologa ‘o ta’avale afi ‘i le vaiaso ‘ua mavae.

‘Ae mo le ali’i ‘e 24 tausaga le matua na ia fa’afoeina le ta’avale na tūla’i mai ai le fa’alavelave, ‘o lo’o ia fa’afitia fo’i moliaga ‘e fa’asaga ia te ia, ‘o lo’o ia fīnauina ai moliaga ‘a leoleo na oso fa’afuase’i lona gasegase ‘i le taimi na tupu ai le fa’alavelave.

IMAGE/ATA: Murray Faivalu