Fa’alauiloa ‘e le STA le āganu’u ‘a Sāmoa ‘i Saina

‘Ua fa’atinoina ‘e le ‘ausiva ‘a le Pūlega ‘o Tagata Tafafao Maimoa ma Fafo le Sāmoana dance group, se fa’alauiloa ‘o le āganu’u ‘a Sāmoa ‘i e mālō tele ‘o Saina. ‘O lenei fa’alauiloa, ‘e ‘auala atu ‘i fa’afiafiaga ‘o siva māsani ‘e pei ‘o le siva āfi, na faia ‘i nisi ‘o taulaga tetele ‘a Saina.

Na malaga le ‘au siva ‘i le nu’u ‘o Chengdu ma Qingdao ‘i le vala’aulia ‘a le ‘Amepasa ‘o Saina ‘i Sāmoa, le Sususga ‘iā Fei Mingxing.

Na fa’aālia ‘e le ‘Ofisa Sili ‘o le STA, le Afioga ‘iā Toleafoa Pativaine Tevita, “na vala’aulia le vāega ‘e fa’atino siva fa’aleāganu’u ‘a Sāmoa, ‘o pese ma nisi, ‘e fa’aālia ai le āganu’u ‘a Sāmoa ‘i Saina, ma ‘auai atu ai le ‘aumalaga ‘i le International Sister Cities Youth Music Festival, ‘o lo’o faia ‘i lea taimi.”

‘O le malaga ‘o lo’o ta’itā’ia ‘e le Susuga ‘iā Fanaea Natu Taulealo, ma ‘ua ia fa’ailoa mai le fiafia tele ‘o tagata Saina ‘i ā latou fa’afiafiaga, ma le to’atele ‘o tagata ‘e fia pu’e ata ma ‘i latou.

‘E to’a 12 le āofa’iga ‘o le ‘au malaga ‘a le Sāmoana, ‘e āofia ai le to’a 10 ‘o le ‘ausiva ma ‘o o’o malaga mo le 3 vaiaso.

ATA: Chinese Embassy in Samoa / Sāvali Newspaper.