Fa’afetaia ‘e le Fono lona 55 ‘o le PIF le sao ‘o le afioga Pesetā Noumea Simi

‘I le mafutaga ‘a Ta’ita’i ‘o Atumotu ‘o le Pasefika lea sā ‘āuai ‘i le fono lona 55 ‘a le Pacific Islands Forum, na ta’ita’ia ai ‘e le Peresetene ‘o le mālō ‘o Palau, ‘o ia fo’i ‘o le Ta’ita’ifono ‘o le Fono ‘a Atumotu ‘o le Pasefika, Surangel Whipps Jr., le avanoa ‘e fa’ailoa ai lana fa’amālō ‘i le Afioga ‘a Pesetā Noumea Simi, le Pule Sili ‘o le Matāgāluega ‘o le Vā ‘i Fafo ‘a Sāmoa, lea ‘ua fa’amāvae mai lona tofiga. 

‘O le afioga ‘a Pesetā Noumea Simi, na fai ma sui ‘o Sāmoa ‘i le Mafutaga po’o le Fono a Ta’ita’i, (Leaders Retreat).

Na fa’aaogā fo’i ‘e le Palemia ‘o le Atu Kuki, Hon. Mark Brown, le avanoa, ‘e fa’aleo ai le agaga lava lea ‘e tasi, ma fa’ao’o atu ai le agaga fa’afetai ‘i le telē ‘o le sao ‘o le afioga ‘a Peseta ‘i le gāluega ‘a le Pasefika. 

‘E lē fou le afioga ‘a Pesetā ‘i matā’upu tau le gālulue fa‘atasi ‘a mālō ‘o le Pasefika ‘i lenei itūlagi. ‘I le tele ‘o tausaga, sā ia fesoasoani tele ‘i le fa‘atūlagaga ma le fa‘amālosia ‘o le fa’amoemoega sā tepa taula‘i ‘i ai le Pasefika ‘i nai tausaga ‘ua tuana’i, ‘e aofia ai lona sao tāua ‘o se tasi ‘o ē na fesoasoani ‘i le fa‘avaega ‘o le fuafuaga ma le fa‘asinomaga lea ‘ua ta’ua ‘o le Blue Pacific.

‘E telē lona sao na fa’atino ‘i le tele ‘o tausaga, ‘i le ātīna’ega ‘o le Blue Pacific, ‘e ala ‘i lona fa’asoa ‘o le tele ‘o lona tomai ma lona poto māsani, lona silafia lelei ‘o fuafuaga fa‘ata‘atitia, fa‘apea ai ma lona naunauta‘iga mālosi ‘e lagolago ma ūna‘ia matā’upu tāua ‘e ave ‘i ai le fa‘amuamua ‘e le Pasefika ‘ātoa.

‘Ua fai ma molimau le telē ‘o lona sao, ‘ona ‘o lona ‘āuai pea ‘i nisi ‘o fuafuaga ‘autū ‘a le Pasefika, ‘e aofia ai le Toe Iloiloina ‘o le Fuafuaga ‘a le Pasefika, fa‘apea le Forum Compact Peer Review Initiative.

Talu ai nei fo‘i, na tōfia ai Pesetā Noumea Simi ‘e le Pacific Islands Forum Troika ‘e ‘avea ma sui ‘o le komiti fa’apitoa na filifilia ‘e le Fono ‘a Atumotu ‘o le Pasefika, ‘e talanoa ma ta’ita’i ‘o lenei itūlagi, ‘i ni suiga ‘e pūlea ai ‘e ta’ita’i ‘o atumotu ‘o le Pasefika ‘o lātou atumotu, fa’apēfea fo’i ‘ona gālulue fa’atasi ma tutū fa’atasi.

Na momoli ‘e le Failautusi Aoao ‘o le Pacific Islands Forum ‘ona mo’omo’oga alofa mō Pesetā, ma fa‘ailoa fo‘i lona agaga fa‘afetai, ma ia saunoa ai, ‘e iai lona talitonuga, ‘o le ‘ā tūmau pea le tāua ‘o le soifuaga galue lelei ‘o Peseta, i totonu ‘o fa‘alāpotopotoga na ia fesoasoani ‘e fa‘amālosi ātili, ‘o taumafaiga fa‘aitulagi na ia fesoasoani ‘e fa‘atūlaga lelei ma fausia, fa‘apea fo‘i ma soifuaga ‘o le to‘atele ‘o tagata ta’ito’atasi ‘ua ia suia ma fesoasoani ‘i ai.

‘O le ‘ā matuā misia lava le fautuaga poto, le atamai ma le silafia loloto ‘o le afioga ‘a Pesetā Noumea Simi ‘i fonotaga ma talanoaga fa‘aitūlagi pei ‘ona saunoa le Failautusi Aoao ‘o le Fono ‘a Atumotu ‘o le Pasefika, pei ‘ona lipotia ‘i sa lātou pepa ‘o fa’amatalaga. 

IMAGE/ATA: Supplied / Pacific Island Forum