Fa’afeiloa’i aloā’ia ‘e le Afio’aga ‘o Apia le Mālō Niu Sila

‘O le afiafi ‘o le Aso To’ona’i sā fa’afeiloa’i aloā’ia ai ‘e le Afio’aga ‘o Apia le Mālō Niu Sila, ‘o le atunu’u ‘o lo’o lātou talimālō ai mō le #CHOGM2024.

‘O le Afioga ‘i le Tama’ita’i Kōmesina Mauāluga ‘o le Mālō Niu Sila ‘i Sāmoa H.E. Si’alei Van Toor, fa’apea sui ‘o le ‘ofisa na ‘auai ai ‘i lea feiloa’iga, ma sā fa’atino ai tū ma aga māsani ‘a le atunu’u, ‘i lana ‘ava ‘o le feiloa’iga.

‘O se avanoa lelei na fa’afiafia ai fo’i alo ma fānau mai le ā’oga ‘a le Tauranga Intermediate School mai Niu Sila ‘e ‘auala atu ‘i le polokalame ‘o le Cultural Exchange ma tupulaga ‘a le Afio’aga ‘o Apia.

‘O le Aso Tofi ‘o le vaiaso fou ‘o le ‘a taunu’u mai ai ‘i fanua le Afioga ‘i le Ali’i Pālemia ‘o Niu Sila ‘iā Christopher Luxon, fa’apea le Afioga ‘i le Sui Pālemia ‘iā Vaovasamānaia Winston Peters mō le fonotaga.