Fa’aauauina pea le matā’upu ‘i le ‘Ōfisa ‘o le Lōia Sili ma le Afioga Leala’ilepule Rimoni Aiafi

‘Ua tu’uina atu ‘e le ‘Ōfisa ‘o le Lōia Sili ni talosaga se 4 ‘i luma ‘o le fa’amasinoga ‘e fa’asaga ‘i le tagi na fa’aulu ‘e le Afioga ‘i le Faipule ‘o Faleata 3, Leala’ilepule Rimoni ‘Aiafi, na ia toe talosagaina ai le toe iloilo ‘o le fa’ai’uga ‘a le fa’amasinoga na tu’uina mai. ‘O lea matā’upu ‘e fa’asaga ‘ia Samuelu Fauena, Lise Marie Schmidt, Sivai Kepi Māmea, Fepulea’i Faimata Su’a, Li’o Fa’ataumalama ‘Au’ava ma le Afioga La’auli’alemālietoa Polata’ivao Fosi Schmidt.

Pei ‘ona silafia ‘e le atunu’u, ‘o le fa’ai’uga ‘o lea fa’amasinoga na tu’uina mai, ‘e lē fa’amaonia tu’ua’iga ‘i le Afioga ‘i le ta’ita’i ‘o le atunu’u, Li’o Fa’ataumalama ‘Au’ava, Fepulea’i Faimata Su’a ma Lise Marie Schmidt. Peita’i, ‘o le tamā ‘ia Samuelu, na fa’amaonia ona moliaga ‘o le fa’asesēina ‘o le āmiotonu, ‘ātoa ai ma lona faia ‘o ni molimau sesē ‘i leoleo, ma ‘e fa’apēnā fo’i ‘i lona faletua ‘ia Sivai Kepi Māmea.

‘Ua talosaga ai le ‘ōfisa ‘o le Lōia Sili ‘i ana talosaga ‘e 4, ‘ina ‘ia faia se lātou tū ‘e ‘auai ai ‘i le matā’upu. ‘O ia talosaga ‘e aofia ai le fa’alēaogāina ‘e le fa’amasinoga ‘o le talosaga ‘a Leala’ilepule Rimoni ‘Aiafi, ‘ia tu’uina atu le mālosi’aga fa’aletūlāfono ‘i le lōia mo seisi ana tālosaga toe iloilo.’E lē gata ‘i lea, ‘ia fa’alēaogāina le talosaga ‘a Leala’ilepule ‘e taofia ai lea fa’ai’uga ‘a le fa’amasinoga mo se taimi lē tūmau, ma le talosaga ‘o le toe iloiloina ‘o lea fa’ai’uga.

Peita’i, na saunoa le Afioga ‘i le Fa’amasino ‘ia Fepulea’i Ameperosa Roma, ‘ua ia taliaina le talosaga ‘a le Lōia Sili ‘e ‘auai ai ‘i le matā’upu lenei, ma ‘ua toe tolopō atu ai loa ‘i le aso 20 Iūlai ‘e toe vala’au ai le fa’aauauina ‘o lea matā’upu.

IMAGE/ATA: Parliament of Samoa & Government of Samoa