Fa’aauau āsiasiga ‘a le Afioga ‘i le Palemia ‘i le māketi ‘i Fugalei

‘O le fa’ai’uga ‘o le vaiaso, na āsia ai ‘e le Afioga ‘i le Palemia, fa’atasi ai ma le Minisitā ‘o Pisinisi Ālā Manuia ma Leipa, le māketi tele ‘i Fugalei, fa’atasi ai ma le fale fa’atali pasi ‘i lea nofoaga ‘o lo’o tū ai.

‘O le va’ai mamao ‘a le mālō, ‘ia toe fa’aleleia lenei nofoaga ‘ātoa, ma ‘ia mautinoa ‘e iai le tūlaga malu puipuia mo le atunu’u lautele ‘o lo’o fa’aaogāina ia ‘āseta. Na saunoa ai fo’i le Afioga ‘i le Palemia mo le va’ai mamao ‘a le mālō, ‘ia mausalī ia ātīna’e mo le tautuaina ‘o le ‘aufaifa’ato’aga ma le ‘aufaipisinisi, ‘o mea taulima ma fuālā’au ‘aina ma fuālā’au faisua.

Na saunoa le ta’ita’i ‘o le atunu’u, ‘i nisi māsina ‘i le āga’i atu ‘i le lumana’i, ‘o le ‘ā iai ni suiga tetele ‘i nei vāega, pe ‘ā māe’a ‘ona fa’atūlaga le fuafuaga mamao ‘a le mālō, mo le toe suia ‘ātoa ‘o le tūlaga lelei ‘o lea nofoaga, ‘e tapuvae tasi ‘iai le ‘aufaifa’ato’aga ma fa’atauga ‘a le mamalu ‘o le atunu’u.

IMAGE/ATA: Government of Samoa Facebook