E mo’omia e le Mālō le galulue fa’atasi ma foma’i e una’i le fa’aleleia atili o le auaunaga a le Soifua Mālōlōina: Palemia

Ua fa’amauina i le 77 tausaga talu ona fa’avaeina le Asosi o Foma’i Fa’amauina a Samoa [Samoa Medical Association] mai le tausaga 1948, o le ulua’i taimi lenei, fa’atoā talosaga fa’apitoa atu ai se Ta’ita’i o le Mālō, e fia talanoa ma fa’asoa ma foma’i uma i le atunu’u.

O le tele o feiloā’iga a Palemia ua mavae ma lea Asosi, o le tauaofiaga lava i lana Fono Fa’aletausaga i tausaga ta’itasi.

Peita’i, ua ‘ese lenei fa’atasiga, ina ua manatu le Palemia, Susuga i le La’aulialemalietoa Leuatea Polāta’ivao Fosi Schmidt se’ia laolao ma fesāga’i ma Foma’i uma i le atunu’u, o se itutino o le anofale e matuā fa’alagolago i ai le lumana’i o le auaunaga a le Matāgaluega o le Soifua Mālōlōina.

Saunoa La’aulialemalietoa, fa’atoā 13 vaiaso talu ona pale le Faigāmālō Fou, peita’i e tele fa’afitauli ua alia’e mai i le auaunaga a le Matāgaluega o le Soifua Mālōlōina, ma o le ‘upu moni, ua matua’i gasegase lava le atunu’u atoa.

O ia lu’itau, ua fautuaina ai e le Palemia le Matāgaluega o Tupe, ina ia fesoasoani e fa’afaigofie auala uma, e vave tali ai i mana’oga o le Matāgaluega o le Soifua Mālōlōina, e ala i le tali vave i ni talosaga mo’omia mo le galuega fa’aleleia, nai lo le tau fa’atalitali i le fa’asologa o galuega [process] ma umi ai lava ona taligā.

“O masini e oka ma mo’omia mo le lua vaiaso, ae fa’atoā maua i le mae’a ai o le 9 masina. E mafua mai ona o le umi o le process o lo’o fa’agaioi ai fuafuaga a le Mālō.

“Ou te ta’utino atu, o le fa’amuamua lea a le Mālō, mo le Soifua Mālōlōina, o ā mea ua uumi, ia fa’apupu’u, o ā mea tetele ia fa’alāiti, o ā vaega ua ta’i fia masina ma tausaga o toso ona o iloiloga, ia fa’aitiitia i le ta’i vaiaso.

“E mafua lava ona fa’afaigatā, o tatou lava, ae lē seu silasila i le soifua mālōlōina o le atunu’u, ona tatou fa’aāogaina ai lea o le fa’autautaga tatau ma vave fa’afaigofie ai mea uma.

E fai o le fale, a’o le anofale, o le agaga mauāluga o La’aulialemalietoa, e fa’asoa fa’ale’āiga, ma momoli se fa’amalosi’au i Foma’i, ina ia lalago fa’atasi ma opogi fa’amoemoega uma o le Mālō, ina ia tineia ai le tele ma le anoanoa’i o fa’afitauli tupito i le soifua mālōlōina lautele o nai o tatou tagata.

“E tāua le fa’amautū o le so’otaga vāvālalata o le Mālō ma Foma’i, ina ia momoli mai so outou finagalo, po’o a itu e ao ina toe aga’i ai le Mālō mo le fa’aleleia atili o le soifua mālōlōina.

“Ua lē utuvā le tele o fa’afitauli ogaoga i le soifua ma’imau o nai o tatou tagata aemaise o le to’atele o i latou ua si’i gasegase i atunu’u i fafo mo togafitiga, ona o le soifua mālōlōina.

“O lona uiga, e tāua ai i le Mālō, ona matuā fa’amuamua ma ‘ave le fa’amamafa i le soifua mālōlōina, ina ia lava aseta ma meafaigaluega mo le fa’atinoga o le galuega, ae fa’apea fo’i i le lava o le aufaigaluega galulue mo le fa’agasologa o auaunaga ‘ese’ese o aso ta’itasi.

“O outou o le fa’avae papa o le soifua mālōlōina, matou te fa’alagolago atu iinā i lo outou tomai ma le silafia, e tali mana’o i le fa’afitauli ua alia’e mai pea, i le fa’aletonu o auaunaga ‘ese’ese a le Soifua Mālōlōina.

Fa’ailoa e le Palemia, e lē i lalo ifo o le $150 Miliona le paketi fuafuaina a le Mālō fa’apitoa mo le Soifua Mālōlōina i tausaga ta’itasi, ae silia ma le $12 Miliona tupe fa’aalu mo gasegase auina atu i Initia ma Niu Sila mo togafitiga.

Ua anoanoa’i tagata ua fano soifua, ona o gasegase e a’afia ai, ma faigatā ona maua togaifitga, na fa’ailoa manino e La’aulialemalietoa, e tatau ona silasila toto’a i ai le Asosi o Foma’i Fa’amauina a Samoa i auala e fo’ia ai, e afua i le fa’ailoa atu o fofō talafeagai i le Mālō, auā ana fa’ai’uga sa’o mo le manuia lautele o le auaunaga a le soifua mālōlōina.

E tele fa’afitauli ma finagalo fa’aālia o Sui o le Asosi o Foma’i Fa’amauina a Samoa, na tu’usa’o i le afioga i le Ta’ita’i o le Mālō, auā lona nofo silafia, ma na talisapaia ma le agaga fa’afetai e le Susuga i le La’aulialemalietoa talosaga uma ua folasia.

O le agaga mauāluga o le Mālō, ia mautū ma maua’a le anofale, e fa’alagolago i ai gasegase autova’a atu mo se mapusaga i tigā ma mafatiaga ua a’afia ai.

Tusia e: Pesetā Tusiga Taofiga (Savali Newspaper)

ATA: Pesetā Tusiga Taofiga & Vaitogi Asuisui Matafeo.