‘E matuitui ma ‘o’ona ‘upu, peita’i ‘ua manumālō le Atua; P.M La’aulialemalietoa

O loifofoga o le alofa, o loimata o le fa’agae’etia, na maligi ifo, ina ua fesaga’i sega’ula ina ua lagona le alofa moni o le tasi i le isi.

O va’aiga uiga ‘ese, ina ua feiloa’i le Itumālō Palota o Fa’asaleleaga #2 ma le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, fa’apea ma le Faigāmālō Filifilia i loimata o le fa’afetai, i le feofoofota’i o le alofa fa’akerisiano, ua fa’alauleleia ai futia ma fa’afitauli ua tuana’i.

E ui i le ‘o’ona, matuitui, ma le mamafa o lafoga ma ‘upu na lalafo aga’i i le Ta’ita’i o le Mālō, e nisi o tamāli’i o le Itumālō Palota o Fa’asaleleaga #2.

Peita’i o lea feiloā’iga, o se moemoe fou, o se amataga fou, a’o se laolao fou, ua fesilafa’i ai i manū ae le’o mala, ua fesaga’i i pu’e o manuia ae le’o le loi fofoga o le fa’anoanoa.

Afua i se ā, ina ua maua le agaga o le fefa’amagaloa’i, ma le loto Kerisiano moni, ina ua talia ma le agaga fiafia, e le afioga i le Palemia, le Kapeneta fa’apea le Mālō o Samoa, le fa’aolooloma’au, a’o le fa’ato’esega a le Itumālō Palota o Fa’asaleleaga #2, ona o futia ua sola.

Saunoa manino le afioga i le Ta’ita’i o le Mālō, Susuga i le La’aulialemalietoa Leuatea Polāta’ivao Fosi Schmidt, o fa’aletonu ua alu, ua ū ai lo tatou tua, ma e lē toe fia manatua ananafi.

“Tatou silasila i le Atua ma lona finagalo, aemaise o le manuia o le Itumālō ma ona tagatānu’u, lafo maia lo outou fa’atuatuaga i le filiga a le Mālō e tusa o lā outou Ta’ita’ifono o le Ofisa o le Fono Fa’avae, auā o tatou lava e tasi, e so’o tino, so’o toto, e ū a le lima tau le pa’u, o tatou lava o le ‘āiga.

“Tatou sisi fa’atasi le fu’a o le manumālō, leaga e moni le alofa o le Faigāmālō Filifilia i le atunu’u atoa.”

I le fa’ato’esega a le Itumālō Palota o Fa’asaleleaga #2 i le Palemia ma le Kapeneta, na manino ai lo latou lalago i le finagalo o le Mālō, ma le naunauta’iga, ina ia ‘aua ‘aua ne’i to’alia fa’amanuiaga o lo’o sasa’a atu e le Mālō tauala atu i le Polōketi 2 Miliona mo lo latou Itumālō.

Saunoa le Fofoga o le Itumālō, e ogaoga lafoga, e tugā ‘upu ua salalau, e matuitui le tui na sunu’i ai le fatu o le Faigāmālō, e matagā ‘upu, e lē mafaufau fa’amatalaga, ui o lea, o foliga va’aia o le Atua i le feiloā’iga o le taeao ma le aso, o le fa’ailoga pa’ia lea, o le i ai o le Atua fa’atasi ma lana fanau, tusa po’o ā fa’afitauli.

Na tauāluga soālaupulega ma le fa’aleleiga i lenei taeao, i le sainia aloā’ia o le ulua’i $1.8 Miliona o le Polōketi Lua Miliona a le Mālō lea o lo’o aofia ai le Fa’amāmā ‘Avega o le ta’i $150 mo tagatānu’u uma o Samoa, fa’atasi ai ma le seleni mo le Fesoasoani mo Ā’oga uma i le atunu’u [One Government Grant].

Tusia e: Pesetā Tusiga Taofiga

ATA: Leota Marc Membrere / Savali Newspaper