‘E leai sou lumana’i manuia ‘e maua ‘i le femisa’ai – saunoa tu’usa’o le Palemia ‘i fānau ā’oga ‘i le Iunivesitē Aoao ‘a Sāmoa

‘E lē māmā ‘i le Mālō le tūla’i mai ‘o fa’afītauli ‘e a’afia ai le ola a’oa’oina ‘o fanau, ‘aemaise lava ‘i totonu ‘o le Iunivesitē Aoao ‘o Sāmoa.

Sa faia le feiloā’iga fa’apitoa ‘a le afioga ‘i le Palemia, Susuga ‘i le La’aulialemalietoa Leuatea Polāta’ivao Fosi Schmidt, mamalu ‘i le Kapeneta fa’apea aiā’oga ‘uma ma Fanau ā’oga ‘uma ‘o lo’o a’otauina ‘i le Iunivesite Aoao ‘o Sāmoa, le naunauta’iga ‘atoa ‘o le Mālō, ‘ia momoli ‘i fanau, ‘o le ola a’oa’oina ma le sā’ili manuia, ‘e lē maua ‘i se femisaa’i, ma le ola fe’aina’i.

‘E lagona lava le fa’anoanoa ‘o le Ta’ita’i ‘o le Mālō, ‘ona ‘o va’aiga na molimauina ‘i luga ‘o ‘upega tafa’ilagi, ‘i ni fusu’aga ‘a fanau ā’oga, ‘ae āfua ‘i fe’ese’eseā’iga ‘i taimi ‘a’o ā’o’oga ‘i Kolisi Mauāluluga ‘i le atunu’u.

Ma na toe fa’amanatu ‘e le Palemia, ‘e matuā ‘i’ivi ai lava le va’ai ‘a le Mālō ‘i nei uiga lē māfaufau, ma le ola fe’aina’i, ‘e lē maua ai se feālofani.

‘E le’i ‘alo saunoaga tu’usa’o ‘a le Ta’ita’i ‘o le Mālō, ‘i le momoli ‘o le tu’uālalo, ‘a’o le fautuaga fa’amatua alofa moni, ‘e ta’u sa’o ‘i fanau, ‘e lēai lēai lēai lava se lumana’i ‘e maua ‘i le femisaa’i ma le fufusu ‘i taimi ‘o ā’oga;

“Afai ‘o fea ‘le ā’oga sa ‘e ā’oga ai, ‘e uma lava ‘i’inā. ‘E te o’o mai loa ‘i totonu ‘o le Iunivesite ‘e tasi lava ‘outou ‘uma. ‘O outou ‘o tama ma teine a’oa’oina ‘i le Iunivesite Aoao ‘o Sāmoa.

“Tu’u le fai kegi [vāega], ‘e lē toe i ai fo’i ni so’otaga, ‘a ‘outou taunu’u loa ‘i’inei ‘i le lotoā ‘a le Iunivesite Aoao ‘o Sāmoa, ‘o lona uiga, ‘o ‘outou ‘o uso ma tuafafine fa’alea’oa’oga ‘a le Iunivesite Aoao ‘o Sāmoa.

“’O ‘outou ‘o le lumana’i ‘o ‘āiga, nu’u ‘ekālesia ‘aemaise Sāmoa. ‘Ia ‘outou va’ai ‘i le tapuā’iga ‘a mātua, le nofo tatalo ‘a ‘ekālesia ‘ina ‘ia tau lau ‘o lou ola a’oa’oina.

“’Ia fa’aāoga tatau avanoa ‘ua ‘outou maua, ‘e sa’ili ai le tusipasi ‘e su’e ai se galuega ‘auā le tausiga ‘o ‘āiga, tautuaina ‘o ‘ekālesia ‘aemaise ‘o nu’u ma itūmālō, ma le lumana’i ‘o le tatou Mālō.

“’Aua ne’i ‘e manatu māmā ‘i le taimi lenei, tou te fiu ‘e fai le olaga pe ā ‘uma le olaga a’oa’oina lelei. ‘Ia ‘alo’alo ‘ese mai fuālā’au fa’asāina ma le ‘ava malosi, ‘e leai ma se taunu’uga lelei ‘e maua ai.

“’E ma’imau ‘atoa le tautigā ‘o mātua ma ‘āiga, pe ‘afai ‘e lē uma lau ā’oga, ‘ae mafua mai ‘i mea vaivai fa’apenei.

“’O le naunauta’iga ‘o Ta’ita’i ‘o le Mālō ‘ua tuana’i, ma ‘i latou ‘uma na taumafaia mai le Iunivesite ‘i lona ‘amataga, ‘ina ‘ia ‘outou manuia.

“’O le ‘a matou fo’i ma le matou talitonuga, tatou te lē toe feiloa’i i se aso fa’apenei.”

Post by Government of Samoa: 6 August 2026

IMAGE/ATA: Government of Samoa / Leota Marc Membrere (adapted by Murray Faivalu / SCR)