‘Ē lē toe faia ‘e le L.T.A ‘Auala Gālue, ‘ua na’o ‘Auala Tetele ‘a le Mālō: ‘Olo
![‘Olo Fiti Afoa Va’ai](https://samoacapitalradio.co.nz/wp-content/uploads/2024/07/Olo-Fiti-Afoa-Vaai.png)
‘Ua fa’asilasila ‘e le Afioga ‘i le Ali’i Minisitā ‘o le Matāgaluega ‘o Galuega Tetele, Fela’uā’iga ma Atina’e ‘Ese’ese iā ‘Olo Afoa Fiti Va’ai, le lē toe a’afia lea ‘o so’o se ‘auala gālue ‘i nu’u ta’itasi, ‘i fuafuaga ‘o galuega fa’aleleia ‘a le Pūlega ‘o Fela’uā’iga ‘i le Lau’ele’ele (L.T.A) ‘i le lumana’i.
Saunoa ‘Olo, ‘o le ‘a ta’oto atu le fa’aleleia ‘o auala nei ‘a se afio’aga ‘i ‘Ofisa ‘o Fono Fa’avae ‘a Itumālō ta’itasi, ‘o lo’o latou fa’asoasoaina le Polōketi ‘o le Miliona Talā ‘a le Mālō.
Na lagā finagalo ‘o nisi ‘o Faipule ‘o le Palemene, a’o talanoaina le Tala Fa’atatau ‘Autū ‘o le Tupe 2024 – 2025 ma le talosaga mo se fesoasoani ‘a le Mālō tauala atu ‘i le L.T.A. ‘e pei ‘ona masani ai, mo le fa’aleleia ma le toe fa’atāina ‘o ā lātou ‘auala gālue.
‘Ae na folasia manino ‘e ‘Olo, ‘o le fesoasoani’ a le Mālō ‘o lo’o tauala atu ‘i le Polōketi Miliona, ‘e tatau ‘i Faipule po’o Ta’ita’ifono fo’i ma ‘Ofisa ‘o Fono Fa’avae ‘uma, ‘ona fa’atūlaga ma fa’ama’oti se vaegātupe mo le fa’aleleia ‘o ‘auala gālue ‘uma ‘i afio’aga ta’itasi ‘o itumālō.
ATA: Sāvali Newspaper.