‘E 3 Tupu ‘o le ‘a āfifio mai ‘i Sāmoa mo le CHOGM 2024

Na fa’ailoa mai ‘e le Afioga ‘i le Pālemia ‘iā Fiamē Naomi Matā’afa ‘i se feiloa’iga ma tusitala ‘auā le fa’alauiloaina ‘o tāpenaga ‘a le Mālō mo le fonotaga ‘o Ta’ita’i ‘o Mālō ‘o le Taupulega (CHOGM) 2024, ‘o le ‘a āfifio mai ‘i Sāmoa ni Tupu ‘e to’atolu.

Saunoa Fiamē, “’E to’atolu Tupu ‘ua fuafua ‘e āfifio mai ‘i le fonotaga ‘a Ta’ita’i ‘o Mālō ‘o le Taupulega (C.H.O.G.M.) lea ‘o le ‘a usuia ‘i Sāmoa nei, ‘e aofia ai lana Afioga ‘i le Maiesetete le Tupu ‘o Peretānia, ‘o le Tupu ‘o Brunei, ma le Tupu ‘o Eswatini, ‘o se tasi ‘o Mālō ‘o ‘Aferika,” ‘o le saunoaga manino lea mai le Afioga ‘i le Pālemia ‘iā Fiamē Naomi Matā’afa.

‘Ua fa’amaonia mai fo’i ‘e le Afioga ‘i le Ta’ita’i ‘o le Mālō, ‘o le ‘a ‘auai ‘uma sui usufono mai atunu’u ‘uma ‘e 56 ‘o le li’o ‘o Mālō ‘o le Taupulega ‘e aofia ai Tupu ‘e to’atolu, ma Fa’auluuluga ‘o Mālō ‘e 34 ‘o le ‘a ‘auai mai.

Mo le silafia, ‘o lo’o sōloga lelei pea ma mautū tāpenaga ‘uma ‘a Sāmoa mo lana taligāmālō ‘i le māsina fou.

ATA: Sāvali Newspaper.