LISTEN LIVE

‘Ave’eseina le Pālemia fa’apea Minisita ‘e to’alima mai le Vāegafa’a’upufa’i ‘a le FAST

by | Jan 16, 2025 | Sāmoa

‘I se fa’asalalauga ‘i luga ‘o ‘upegatafa’ilagi mai le Ta’ita’ifono ‘a le vāegafa’a’upufa’i ‘a le Fa’atuatua ‘i le Atua Sāmoa ‘ua Tasi (FAST), le Afioga ‘iā La’auli Leauatea Polata’ivao Fosi Schmidt ‘i le pō ‘o le Aso Lulu 15 Ianuari 2025, ‘i le 10:42pm (taimi Niu Sila). Na fa’asilasila mai ai ni i’uga mai le fonotaga ‘a le fa’afaletui, ‘i le itulā ‘e 5pm ‘i le afiafi lava lea.

‘I le saunoaga ‘a La’auli, ‘ua ‘autasi le finagalo ‘o sui faipule ‘e 20 ‘a le vāegafa’a’upufa’i na ‘auai, ‘e:

  1. ‘Ave’eseina le tofi ‘o le Ta’ita’i ‘o le vāegafa’a’upufa’i mai le Afioga ‘i le Pālemia Fiame Naomi Matā’afa,
  2. ‘Ave’eseina le toe ‘avea ‘o ia ma sui ‘auai ‘a le FAST,
  3. ‘Ave’eseina Minisita ‘e to’alima ma le toe ‘avea ma sui ‘auai ‘a le FAST.

‘O lea ‘ua ‘ave’eseina ai le Afioga ‘i le Pālemia Fiame Naomi Matā’afa, le Afioga ‘i le Sui Pālemia ‘iā Tuala Iosefo Ponifasio, le Afioga ‘ia Leatinu’u Wayne Fong, le Afioga ‘iā Olo Afoa Fiti Va’ai, le Afioga ‘iā Toeolesulusulu Cedric Schuster, fa’apea le Afioga ‘iā Faualo Harry Schuster ma sui ‘auai ‘a le FAST, ma sā ‘amata fa’amamaluina mai le pō ‘o le Aso Lulu.

‘O lenei fa’ai’uga na saunoa le Afioga ‘iā La’auli ‘e fa’apea, na māfua mai ‘i le lē ‘auai atu ‘o nei sui ‘i fonotaga ‘e 3 na talo ‘a le fa’afaletui, ‘e soālaupule ai nisi ‘o matā’upu ‘o lo’o feagai ai nei ma le vāegafa’a’upufai ma le atunu’u.

‘O lenei matā’upu ‘e so’otaga ‘uma ‘i le gasegaseāmāΙō ‘o lo’o feagai ai nei ma le faigāmālō ‘a le FAST, ‘ina ‘ua fa’amutaina ‘e le Afioga ‘i le Tama’ita’i Pālemia tofiga ‘o le Afioga ‘iā La’auli, ‘ona ‘o moliga ‘o lo’o fa’asaga ‘iā te ia, fa’apea nisi ‘o Minisita ‘e to’atolu lea na fa’amutaina fo’i ō latou tofiga ‘i lenei vaiaso.

‘O le ‘a tālia se tali mai ‘i lenei matā’upu mai le Ta’ita’i ‘o le Mālō fa’apea Minisita ‘ua ‘ave’eseina mai le vāegafa’a’upufai, ‘aemaise le māta’itūina pea ‘e le atunu’u tūlaga ‘uma ‘o lo’o fa’agāsolo ai nei.

ATA: Sāmoa Capital Radio (design), individual members (Government of Sāmoa)