LISTEN

‘Ausia le 71% ‘o tagata pālota ‘ua māe’a lesitala, 8 Itūmālō ‘ua silia ma le 100% la latou lesitala

by | Jun 19, 2025 | Sāmoa

‘Ua fa’afetaia ‘e le Komesina ma le ‘Ofisa ‘o Faigā Pālota Itūmālō Pālota ‘e valu, ‘ua silia ma le 100% tagata ‘ua māe’a lesitalaina mō le Pālota Tele ‘i lenei tausaga ‘i le Aso Faraile, 29 ‘Aukuso 2025.

‘O ia Itāmālō Pālota ‘e 8, ‘e 6 Itūmālō Pālota ‘i Savai’i ‘ae 2 Itūmālō Pālota ‘i ‘Upolu.

Mō Salāfai ‘e aofia ai;

GAGA’EMAUGA #2:

  • Tagata Pālota: 925
  • Tagata ‘ua Lesitala: 1,025
  • Fa’asiliga ‘o Tagata Lesitala: 101
  • Pasene Tagata ua Lesitala: 111%

GAGAIFOMAUGA #1:

  • Tagata Pālota: 790
  • Tagata ‘ua Lesitala: 836
  • Fa’asiliga ‘o Tagata Lesitala: 46
  • Pasene Tagata ‘ua Lesitala: 106%

GAGAIFOMAUGA #2:

  • Tagata Pālota: 1,120
  • Tagata ‘ua Lesitala: 1,318
  • Fa’asiliga ‘o Tagata Lesitala: 198
  • Pasene Tagata ‘ua Lesitala: 118%

GAGAIFOMAUGA #3:

  • Tagata Pālota: 778
  • Tagata ‘ua Lesitala: 922
  • Fa’asiliga ‘o Tagata Lesitala: 144
  • Pasene Tagata ‘ua Lesitala: 119%

Mō ‘Upolu ‘e aofia ai;

FALEALILI #2:

  • Tagata Pālota: 771
  • Tagata ‘ua Lesitala: 818
  • Fa’asiliga ‘o Tagata Lesitala: 47
  • Pasene Tagata ‘ua Lesitala: 106%

VA’A ‘O FONOTĪ:

  • Tagata Pāalota: 817
  • Tagata ‘ua Lesitala: 928
  • Fa’asiliga ‘o Tagata Lesitala: 111
  • Pasene Tagata ‘ua Lesitala: 114%

‘E māe’a le galuega lesitala ‘a le ‘Ofisa ‘o le Komisi ‘o Faigā Pālota ‘i le itulā’ e 8:00 ‘anapō, Aso Lulu, 18 Iuni 2025, ‘ua ‘ausia le 82,709 ‘o tagata ‘e tatau ‘ona pālota ‘ua māe’a lesitala ‘atoatoa.

‘I lea aofa’i, ‘ua fa’amauina ai le o’o atu ‘i le 71% ‘o tagata pālota ‘ua māe’a ‘ona lesitala, ‘o lona uiga toe 29% ‘e le’i lesitala tusa lea ma le 34,516 tagata.

‘O le aofa’iga ‘atoa ‘o tagata ‘e tatau ‘ona pālota ‘i le Pālota Tele 2025, ‘e 117,225.

‘O le tatalo ‘a le afioga ‘i le Komesina, ‘ina ‘ia manatua ‘e tagata pālota ‘uma, ‘o le lesitala ‘o le faitoto’a lea, ‘e fai ai sō latou sao ‘auā le filifilia ‘o ni Ta’ita’i moni mō Sāmoa ma ona ‘upufai, ‘ina ‘ia manuia ai le atunu’u mō nei ma le lumana’i.

‘O le ‘amataga ‘o le māsina fou, ‘o le ‘a tāpunia ai le avanoa mō le lesitala ‘o tagata pālota.

ATA: OEC Commisioner / OEC.