‘Auai atu le Fofoga Fetalai ‘i le Fonotaga ‘a le Kōmiti Fa’afoe mō Fofoga Fetalai ma ‘Ōfisa fa’a Sui Usufono ‘a le Taupulega ‘i le mōtu ‘o Guernsey

Na auai atu le Fofoga Fetalai o le Palemene a Samoa, Susuga Hon. Papalii Lio Oloipola Taeu Masipau faatasi ai ma Fuimaono Alpha Apineru i le Fonotaga a le Komiti Faafoe mo Fofoga Fetalai ma Ofisa faa Sui Usufono a le Taupulega (CSPOC) i le motu o Guernsey i le Aso 9 – 11 o Ianuari 2025.

O le Komiti Faafoe lenei e aofia ai Fofoga Fetalai mai Palemene o Australia, Canada, India, Kenya, Tonga, United Kingdom, Guernsey ma Samoa faatasi ai ma Ofisa Sinia o le Palemene.

O lenei Fonotaga na faatalanoaina ai mataupu eseese, faapea ai ma le lauliliuina o mataupu e talanoaina mo le isi Fonotaga Autu i le lumanai. O se tasi o vaega taua mai lea Fonotaga o le filifiliaina lea o se ulutala na tuuina atu e Samoa, ua fuafuaina e tuu i totonu o le Polokalame mo le Fonotaga Autu i India 2026; ua faaulutalaina, “O le sao a tagatanuu i tua atu o Faiga Palota” “Citizen Participation Beyond Voting” o loo saili ai metotia eseese e mafai ona siitia ai le silafia ma le nofo malamalama o tagatanuu aemaise ai o lo latou sootaga i Galuega a le Maota.

O “Fonotaga mo Fofoga Fetalai ma Ofisa faa Sui Usufono a le Taupulega” (CSPOC) sa faavaeina i le tausaga 1969, i se faamaite a le Fofoga Fetalai mo Canada sa iai i lea taimi. O le nei Fonotaga e Tutoatasi, ma e leai sona piitaga i Faalapotopotoga o Palemene a Malo o le Taupulega, Faalapotopotoga o Failautusi o Palemene a Malo o le Taupulega po o Taitai o Malo o le Taupulega. O lenei Fonotaga e ta’i lua tausaga ma faatino, ma e masani na usuia i le amataga o Ianuari, ma le fonotaga a le Komiti Faafoe i tausaga e sosoo ai.

ATA: Parliament of Samoa.