Āsia ‘e le ta’ita’i ‘o le atunu’u le tasi ‘o fuafuaga ‘a le mālō mō ‘auala fa’aleleia

‘O se āsiasiga ‘a le Afioga ‘i le ta’ita’i ‘o le atunu’u ma sui ‘o le Kapeneta ‘i lenei vaiaso, na ō lātou āsia ai le galuega ‘o lo’o fa’atautaia ‘i le taimi nei, ‘i le ‘auala tele mai le āfio’aga ‘o Letogo āga’i atu ‘i Le Mafa. ‘O sē tasi nei ‘o vāega ‘o ‘auala ‘a le atunu’u ‘o lo’o pito ‘i sili ‘ona telē le fa’alētonu, lea ‘ua fa’asolo ‘ina toe fa’aleleia.

‘O le fa’atāua ‘a le Afioga ‘i le ta’ita’i ‘o le atunu’u, ‘o le toe silasila toto’a lea ‘i nisi ‘o vala ‘e ao ‘ona ‘ave ‘iai le fa’amuamua ‘a le mālō, ‘e tauala atu ‘i le Pūlega ‘o le LTA ma konokarate ‘o lo’o lātou fausiaina ‘auala tele nei. ‘O le sini, ‘ia ‘aua ne’i ‘avea nei galuega fa’aleleia ‘o se ātīna’e mō sina taimi, ‘a ‘ia mautinoa le mautū ma le lelei ‘āto’atoa, ‘ia ‘ausia ai nisi āugātupulaga ‘e tele ‘i le lumana’i.

‘I le pepa ‘o fa’amatalaga, na fa’ailoa ai le finagalo ‘o le Afioga ‘i le Palemia, ‘o se galuega tāua lenei mo le saogalēmū ‘o le atunu’u lautele ‘o lo’o lātou fa’aaogāina nei ala tetele.

IMAGE/ATA: Government of Samoa Facebook