64 tausi soifua fou ‘ua fa’au’uina

‘E 64 le aofa’i ‘o ali’i ma tama’ita’i tausi soifua fa’au’uina ‘o le ‘a ‘āmatalia le latou tautua mō le atunu’u ‘i le māe’a ai ‘o le lātou fa’au’uga ‘i le vaiaso na se’i mavae atu.

Sā fa’atumulia le potu fono ‘a le Matāgāluega ‘o le Soifua Mālōlōina ‘i Moto’otua ‘i ‘aiga, uo ma e masani, ‘e molimauina le fa’amoemoe ‘o le ‘aufa’u’u.

Mai ‘i lea 64 ‘o le ‘aufa’au’u, ‘e to’a 14 tausi soifua maua fa’ailoga Tipiloma, 45 tausi soifua resitala sā fa’au’u ‘i le fa’ailoga Tikeri, ‘ae to’alua tausi soifua ‘i le vāega ‘o le Fa’atōsaga (Midwife) ‘ua fa’au’uina ‘i le fa’ailoga ‘o le Post-Grad.

‘I le saunoaga ‘autu ‘a le Afioga ‘i le Minisita ‘o le Soifua Mālōlōina ‘iā Valasi Luaipitofanua Togamaga Tafito Selesele, sā ia momoli ai le fa’amālō ‘i tausi soifua ‘uma ‘ua fa’au’uina.

“’O le asō, ‘o lea ‘ua fa’amalieina le Komiti Fa’atonu ma le Matāgāluega, ‘i le vāega mulimuli ‘o lā ‘outou polokalame ma taumafaiga fa’ai’u, le toe aso na ‘i Moamoa.

“Muaō lai’a ma siniō, auā ‘o lea ‘ua tau le ‘ai, ‘e pei ‘o le faiva ‘o tapalega.

“Mālō finau, mālō taumafa’i, mālō fo’i le onosa’i.

“’E lē taumate sā ‘outou feagai ma fitā ma faigata, ‘aemaise ‘o fa’afitauli ‘e ono muta ai le fiafia ‘aemaise ‘o le taumafai.

“’Oute manatua lelei fo’i ‘e a’u le taimi ‘a’o a’oga ‘i Apia nei – le tu’ua ‘o mātua ma ‘aiga ‘i Savai’i, ‘i le nofo ‘i aiga ‘ese, le leai ‘o se pāsese mō feoa’iga, leai se lunch ‘ae ‘aifua mai uō, ma le anoanoa’i ‘o fa’afitauli, sā feagai ai ‘a’o a’o’oga.

“E le’o toe po fo’i malaē, i le tulaga faigata sa tatou iai i le taimi o le Fa’ama’i o le Misela, aemaise ai le taligāmālō sa feagai ma le tatou atunu’u.

“Manatu sa outou aiaiuli lava ia saogalemū ma manuia Samoa ma e iai le talitonuga o le to’atele o outou le au fa’au’u, sa telē lo outou sao i le fa’atinoga ma taumafaiga uma sa feagai ma le Matagaluega o le Soifua Malōlōina, auā le puipuia o le o’o mai o le fa’ama’i.

“E momoli atu ai la’u fa’afetai fa’apitoa, iā outou uma sa aofia i ia polokalame a le Matagaluega.

Sa fa’ailoa ai fo’i e le Afioga i le Minisita se tasi fo’i o taumafaiga, lea ua maua ai avanoa o atunu’u o le Pasefika e auina atu ai foma’i ma tausi soifua e a’oa’oina i le tomai ma agava’a fa’apitoa o le soifua malōlōina o lo’o fai ma lu’itau i le Pasefika,

Ma o le taualuga lea o le fono sa malaga atu ai le Afioga i le Minisita i Filipina i le fa’ai’uga o le masina ua mavae.

O toe fa’amanuiaga a le Afioga i le Minisita, “Ia saga’i ane lea i outou faiva alofilima fa’atausoifua. Ia outou manuia.

O le Susuga i le fa’afeagaiga iā Kamuta Mata’afa sa ta’ita’ia le sauniga e fa’afetaia ai le alofa ma le agalelei o le Atua, ona ua i’u manuia le tausinioga a tausi soifua sa alo atu iai.

ATA: Sāvali Newspaper.