$61 miliona talā le fa’amanuiaga ‘a le NPF mō le ‘aufaisāofaga ‘a le atunu’u ‘i le fa’ai’uga ‘o le 2025/2026 – ‘ātoa ai le 10%

‘O le taeao nei ‘i se feiloā’iga ma le Afioga ‘i le Minisitā ‘o Tupe Hon. Mulipola Anarosa Ale Molio’o, a’o le Afioga ‘i le Sui Palemia, fa’apea le Afioga ‘i le Tama’ita’i Pule Sili ‘o le NPF, le Afioga ‘iā Lemalu Selesitina Pulega Meni-Reti na fa’asilasila fa’alaua’itele ai se fa’amanuiaga ‘e 6% pasene mō le ‘aufaisāofaga ‘a le atunu’u, ‘e tusa lea ma le $61,000,000 miliona talā mō le fa’ai’uga ‘o le tausaga fa’aletupe 2025/2026.

‘O le ‘amataga ‘o le tausaga nei na fa’amatu’u mai ai ‘e le NPF le tusa ma le $43 miliona talā mō tāpenaga ‘o le toe fo’i atu ai ‘o fānau ā’oga ‘i le ‘amataga ‘o le tausaga, ‘i le faigafa’avae ‘a le faigāmālō ‘a le FAST, ‘e fa’apea ‘o le ‘a tala fa’alua dividends po’o fa’amanuiaga nei ‘i le tausaga fa’aletupe, ‘o le muamua ‘i le Back to School, fa’apea le End of Financial Year dividends.

‘O le aofa’iga ‘o le fa’amanuiaga ‘o lenei tausaga 2025/2026, ‘e 10% ($104,000,000).

IMAGE/ATA: Screengrab / Government of Samoa