5,000 ‘i le 6,000 lesitala fou mō le palota – OEC

O le fa’amāmā ‘avega a le Mālō i le ta’i $150 mo tagatānu’u uma o Samoa i le toe a’e ai o fanau i ā’oga, o se tasi lea o fesoasoani tele mo le Ofisa o le Komisi o Faigā Palota, e unā’ia ai tagata e le’i lesitala, ina ia lesitala i o latou Itumālō Palota ina ia mafai ai ona palota i so’o se Palota i le lumana’i.

O le fa’aāogaina o Lola Palota e fa’asoa ai lea fa’amāmā ‘avega mo i latou ua 21 tausaga ma luga atu, o se itu lelei lea mo le fa’amalosia o tagatānu’u Samoa ina ia lesitala loa.

Auā a lē lesitala, e lē maua fo’i le seleni $150.

Na va’aia le tumutumu o le mamalu o le atunu’u i le Ofisa o le Komisi o Faigā Palota i Mulinu’u i nai vaiaso ua mavae, e fia lesitala, ua molimauina ai le to’atele o i latou, sa nofoa’i, leai se fa’amamafa, ma manatu māmā i le lesitala ma palota.

O se fa’ama’ite lelei lea mo lenei auaunaga tāua, ua ‘avea o se so’otaga talafeagai, e fa’ama’ite ai i le atunu’u lautele, e tāua le lesitala, auā a lē lesitala, e leiloa fo’i pe fa’apefea ona maua le ta’i $150 tauala mai i Ofisa o Fono Fa’avae.

Saunoa le afioga i le Palemia o le Mālō Tuto’atasi o Samoa, Susuga i le La’aulialemalietoa Leuatea Polāta’ivao Fosi Schmidt, ua fa’amauina e le Ofisa o le Komisi o Faigā Palota, ua i le va o le lima afe aga’i le ono afe tagata fou ua mae’a ona lesitala, ma le naunauta’iga ia mafai ai ona maua ā latou ta’i $150.

“O le itu lelei o lea aga’i e lesitala, e vaoia ai le lesitala o isi, ae le’o lesitala isi.

“E lē tatau ona toe tupu le tulaga lea, auā e tatau lava ona atoa le fuainumera, ona o le fa’amoemoe o tatou Faigā Palota i le lumana’i.”

O le agaga atoa o lea fesoasoani, ina ia maua se seleni fa’aagaga a nai mātua ma ‘āiga, e tapena ai mea’āoga ma toniga ā’oga o fanau i le toe a’e ai o ā’oga i lenei tausaga fou 2026.

Tusia e: Taunuuga Toatasi

ATA: Leota Marc Membrere / Savali Newspaper