$45.5 miliona talā le fa’amanuiaga ‘a le NPF mō le ‘aufaisāofaga ‘a le atunu’u

‘O le taeao nei ‘i se feiloā’iga ma le Afioga ‘i le Minisitā ‘o Tupe Hon. Lautimu’ia Afoa Uelese Va’ai, fa’apea le Afioga ‘i le Tama’ita’i Pule Sili ‘o le NPF, le Afioga ‘iā Lemalu Selesitina Pulega Meni-Reti na fa’asilasila fa’alaua’itele ai se fa’amanuiaga ‘e 4% pasene mō le ‘aufaisāofaga ‘a le atunu’u, ‘e tusa lea ma le $45.5 miliona talā mō le fa’ai’uga ‘o le tausaga fa’aletupe 2024/2025.

‘O le ‘amataga ‘o le tausaga nei na fa’amatu’u mai ai ‘e le NPF le tusa ma le $44 miliona talā mō tāpenaga ‘o le toe fo’i atu ai ‘o fānau ā’oga ‘i le ‘amataga ‘o le tausaga, ‘i le vāega muamua lea ‘o le faigafa’avae fou ‘a le faigāmālō ‘a le FAST ‘ua fa’amuta atu nei, ‘e fa’apea ‘o le ‘a tala fa’alua dividends po’o fa’amanuiaga nei ‘i le tausaga fa’aletupe, ‘o le muamua ‘i le Back to School, fa’apea le End of Financial Year dividends.

‘O le aofa’iga ‘o le fa’amanuiaga ‘o lenei tausaga 2024/2025, ‘e 10%. 4 pasene lea ‘ua fa’asafua mō le ‘aufaigasāofaga, 2% ‘ua toe fa’amatu’u atu mō le fa’agalueina ‘i le saofaga, fa’aopopo ai ma le 4% ‘iā Fepuari ‘o le tausaga nei.

Na fa’ailoa le agaga fa’afetai ‘o le Afioga ‘i le Ali’i Minisitā, ‘ona ‘o le tūlaga lelei ‘o lo’o iai nei le NPF. Na saunoa Lautimu’ia, ‘ua tolu nei tausaga soso’o mai le 2023, ‘o va’aia pea le si’itia ‘o fa’amanuiaga ‘e fa’amatu’u atu ‘i le ‘aufaisāofaga:

• 2023: 8.3% = $73 miliona
• 2024: 9% = $87.3 miliona
• 2025: 10% = $112.1 miliona, ‘e aofia ai ma le vāega muamua ‘iā Fepuari 2025

‘O le itūlā ‘e 12am ‘i le pō ‘ananei, ‘o le ‘a mafai ai ‘ona fa’aaogāina ai ‘e le mamalu ‘o le ‘aufaisāofaga le portal ‘a le NPF, mō le tu’u mai ‘i tua ‘o lenei fa’amanuiaga. Mā na saunoa le Afioga ‘i le Pule Sili iā Lemalu, ‘e tatau ‘i le pa’ia ‘o le atunu’u ‘ona fa’amautinoa ‘o sa’o latou fa’amaumauga ‘o nūmera tusitupe, ‘ina ne’i sesē le vāega ‘e alu iai le sēleni, ‘aemaise pe ‘afai ‘e lē ‘o toe fa’aaogāina lau tusitupe ‘i le faletupe ‘o lo’o ‘e iai.

ATA: Sāmoa Capital Radio / Murray Faivalu