40 tausaga ‘o fa’aauau pea le ‘au’aunaga ‘a fōma’i mai Saina ‘i falema’i ‘a Sāmoa

‘Ua momoli atu ‘e le Afioga ‘i le Minisitā ‘o le Soifua Mālōlōina, le Afioga ‘iā Va’aaoao Salumālō Alofipō, ‘e fai ma sui ‘o le mālō ‘o Sāmoa, ‘e fa’afetaia ai le mālō ‘o Saina ‘i le fai pā’aga ‘e ala ‘i le soifua mālōlōina. Na fa’atautaia se sauniga fa’apitoa ‘e fa’atōfā ma fa’amāvae atu ai ‘i le kulupu lona 24 mai Saina, ‘o ali’i ma tama’ita’i fōma’i sa fesoasoani ma ofo mai la lātou tautua mo la tātou falema’i ‘i Moto’otua.

‘O le fesoasoani fa’apā’aga lenei ‘a Saina ma Sāmoa, ‘e suisui mai ai ‘aumalaga ‘o kulupu ‘a fōma’i ‘i tausaga ta’itasi, ‘o ni fōma’i ‘i matātā ‘ese’ese, ma ‘o se fesoasoani pito ‘i sili lea ‘ona mana’omia ‘e le tātou Matāgaluega ‘o le Soifua Mālōlōina, ‘i le ‘uti’uti ‘o le ‘aufaigaluega ‘aemaise lava ‘i ali’i ma tama’ita’i fōma’i.

‘E lē gata ‘ina fa’afetaia ‘e le Afioga ‘iā Va’aaoao le kulupu lona 24 lenei ‘o le ‘a tu’ua le atunu’u, ‘ae ‘ua fa’afeiloa’ia ai fo’i leisi ‘aumalaga ‘o fōma’i lona 25, lea fo’i ‘ua taunu’u ‘i le atunu’u ‘e fa’aauauina le tautua ‘i le faigā pā’aga vāvālalata ‘a mālō ‘e lua. ‘I le taimi lava ‘e tasi, ‘ua fa’amanatuina ai ‘i lea lava sauniga, le ‘ātoaga ‘o le 40 tausaga ‘o le faigā pā’aga lenei ‘i le vā ‘o le soifua mālōlōina ma le mālō ‘o Saina.

IMAGE/ATA: Government of Sāmoa