4% le tului fa’ameaalofa ‘a le S.N.P.F mō ana ‘aufaisaofaga

by | Jan 23, 2025 | Sāmoa

E 4% le tului fa’ameaalofa a le Fa’alapotopotoga o Fa’aputugātupe mo le Lumana’i Manuia o Tagata (S.N.P.F.) e pei ona fa’alauiloa e le Afioga i le Minisitā iā Lautimuia Afoa Uelese Va’ai i le asō.

Ma o se tala fiafia fo’i lea mo le aufaisaofaga, ona o lea fa’amāmā avega a le S.N.P.F. mo le toe a’e o ā’oga a le fanau i lenei tausaga.

“E 4% o le ā fa’asoa atu mo le aufaisaofaga mai tupe teu fa’afaigaluega a le Fa’alapotopotoga, e fesoasoani ai i ‘āiga mo le toe a’e o fanau i ā’oga.

“O le 12:00am i le vaveao o le Aso Sa, 26 Ianuari 2025 o le a amata tala ai i tua lea fa’amanuiaga e fa’aāogaina ai le auaunaga fa’atekonolosi a le Fa’alapotopotoga le ‘S.N.P.F. Portal’.

Saunoa le Minisitā, e silia ma le $43 miliona o le ā fa’atupe ai lea fa’amanuiaga a le S.N.P.F.

O le tausaga ua mavae atu, e 2.4% lea fo’i sa tala i tua i le mafua’aga lava lea, e fesoasoani i ‘āiga mo le toe a’e o ā‘oga a le fanau.

“O lea ua tatou i ai i lenei tausaga, o lea ua si’itia ai i le 4% le fa’amanuiaea o le ā maua e le aufaisaofaga.

“O lona uiga, o le ā e aga’i lava i luga le pasene o tupe e maua e nai o tatou tagata o lo’o i ai saofaga i le Fa’alapotopotoga”.

E i ai fo’i nisi o vaega e pei ona toe fa’amanatu mai e le Afioga i le Ofisa Sili o Pulega a le S.N.P.F iā Lemalu Selesitina Reti, ina ia silafia e le aufaisaofaga.

“Afai o lau saofaga lea e poloka, e mafai lava ona tala i tua lau seleni mai lea fa’amanuiaga.

“Ae ia manatua, e tatau ona e lesitala i luga o le tatou polokalame o le Portal ona mafai lea ona tala i tua lau seleni”.

Tusia: Taunuuga Toatasi (Sāvali Newspaper)

ATA: Taunuuga Toatasi (Sāvali Newspaper).