͏Toe taliu ‘i fanua le Afioga ‘iā Ali’io’āiga Feturi Elisaia, ‘i le māe’a ‘o le 5 tausaga ‘o lana tautua fa’a-Komesina Mauāluga ‘o le Mālō Sāmoa ‘i Fiti

‘O le aso ananafi na feiloa’i atu ai le Afioga ‘iā Ali’i’oāiga Elisaia Feturi, ‘i le Peresetene ‘o le Mālō ‘o Fiti, Ratu Naiqama Lalabalavu, ‘e fa’amāvae āloa’ia mai lona tofiga fa’a-Komesina Mauāluga ‘o le Mālō Sāmoa ‘i le Mālō Fiti.

‘Ua māe’a ai nei le lima tausaga ‘o le tofiga ‘o le Afioga ‘iā Feturi, ‘ina ‘ua tōfia ‘e le faigāmālō ‘i le māsina ‘o Mati 2021.

Na fa’ailoa ‘e le Afioga ‘i le Peresetene ‘o Fiti Lalabalavu, lona agaga fa’afetai ‘i le Afioga ‘iā Ali’i’oāiga, ‘ona ‘o lana tautua fa’amāoni ma lona sao tāua ‘i le fa’amālosia ‘o le vā feāloa’i ‘i le vā ‘o Sāmoa ma Fiti, fa’apea fo’i ma lona lagolago ‘i taumafaiga fa’aitūlagi mō atunu’u ‘o le Pasefika.

Na saunoa le Peresetene ‘e fa’apea, ‘o lo’o tūmau pea le mafutaga vāvālalata ‘i le vā ‘o Sāmoa ma Fiti, ‘e fa’avae ‘i le tele ‘o tausaga ‘o le so’otaga fa’asolopito, aganu’u ma ‘āiga. Na ia tā’ua fo’i le sao ‘o tagata Sāmoa ‘o lo’o nonofo ‘i Fiti ma tagata Fiti ‘o lo’o nonofo ‘i Sāmoa ‘i le fa’amālosia pea ‘o nei so’otaga.

‘I lana saunoāga fa’amāvae, na momoli ai ‘e le Afioga ‘iā Ali’ioaiga lona agaga fa’afetai ‘i le Peresetene, le Mālō ma tagata ‘o Fiti ‘ona ‘o le ālolofa ma le talimālō sa ia maua ‘i lenei taimi ‘ātoa ‘o lana nofoā’iga.

Na ia saunoa ‘e fa’apea, ‘o le fa’atūina ‘o le ‘Ōfisa ‘o le Komesina Mauāluga ‘o Sāmoa ‘i Suva ‘o se fa’amāoniga lea ‘o le naunauta’iga ‘o Sāmoa ‘e gālulue so’oso’ofa’atasi ma Fiti fa’apea isi sui ‘o le Pacific Islands Forum, ‘ina ‘ia tali atu fa’atasi ‘i lu’itau ‘o lo’o feagai ma atunu’u ‘o le Pasefika.

‘O le Afioga ‘iā Ali’io’āiga Feturi Elisaia na tōfia ‘e ‘avea ma Komesina Mauāluga ‘i Fiti ‘iā Mati ‘o le 2021, ma ‘o ia fo’i ‘o le ulua’i Komesina nofotūmau ‘a Sāmoa ‘i Fiti talu ‘ona fa’avae le ‘ōfisa ‘i Suva.

‘E silia ma le 40 tausaga ‘o tautua le Afioga ‘iā Ali’i’oāiga ‘i galuega fa’alevā’omālō mō Sāmoa. Na ‘āmata mai lana tautua ‘i le Matāgaluega ‘o le Vā ‘i Fafo ‘i le tausaga ‘e 1979, soso’o ai ma lona ‘avea ma Failautusi Muamua ‘i le ‘Ōfisa ‘o le Komesina Mauāluga ‘a Sāmoa ‘i Niu Sila. Sa galue fo’i ‘o ia ‘o le Sui Failautusi ‘o le Matāgaluega ‘o le Vā ‘i Fafo, a’o le’i ‘avea ma Sui Tūmau ‘o Sāmoa ‘i Mālō ‘Aufa’atasi (United Nations) ‘i Niu Iōka mai le 2003 se’ia o’o ‘i le 2021. ‘I lea vaitaimi sa ‘avea ai fo’i ‘o ia ma ‘Amapasa ‘o Sāmoa ‘i le Iūnaite Setete ‘o ‘Amerika ma le Komesina Mauāluga ‘o Sāmoa ‘i Kānata, ma sa fai ma sui ‘o Sāmoa ‘i le tele ‘o fonotaga ma feūtana’iga fa’avā’omālō.

‘O se tautua īloga mō Sāmoa ‘i le tele ‘o tausaga, ma ‘o lona poto māsani ‘i galuega fa’avā’omālō na ‘avea ma sao tāua ‘i le fa’alauteleina ‘o le igoa lelei ‘o Sāmoa ‘i le lalolagi ma le fa’amālosia ‘o mafutaga ma so’otaga vāvālalata ma atunu’u ‘o le Pasefika ma le lalolagi ‘ātoa.

͏’O le toe taliu ai la ‘i Sāmoa ‘o le Afioga ‘iā Ali’i’oāiga, ‘e lē ‘o mautinoa ‘i le taimi nei se isi tofiga ‘i le lumana’i ‘e tautua ai pea mō le atunu’u.

IMAGE/ATA: Fiji Government