Tolopō le fa’amasinoga ‘o Bainimarama

‘Ua toe tolopōina ‘e le Fa’amasinoga Māualuga ‘i Suva le fa’ai’uga ‘o le matā’upu ‘o lo’o fa’agāsolo fa’asaga ‘i lē sā ‘avea muamua ma Palemia Bainimarama ma fa’apea lē sā ‘avea muamua ma Komesina o Leoleo Sitiveni Qiliho, ua toe tolopō ‘i le aso 2 ‘o Oketopa ‘o le tausaga nei.

‘Ua talosagaina le faamasino ia Thushara Rajasinghe mō nisi faamatalaga mai itu ‘e lua ‘i le fa’auigaina ‘o vāega patino ‘o le Fa’avae o Fiti. ‘O lo’o mōlia Bainimarama ‘i le mōliaga ‘e tasi, ‘o lona faia lea ‘o fa’atonuga le talafeagai ‘i se tagata ‘ōfisa ‘o le mālō. ‘O tu’ua’iga ‘o lo’o tā’ua ai ‘e fa’apea, ‘i le vā o le aso 21 ‘o Mē ‘e o’o atu ‘i le aso 18 ‘o Aukuso, 2021, na ia fa’atonuina ai le Sui Komesina ‘o Leoleo i lena taimi, ‘o Rusiate Tudravu, ina ia fa’amuta le tautua ‘a Sātini Penieli Ratei ma Tomasi Naulu.

‘O mōliaga ‘o lo o tā’ua ai ‘e fa’apea, na fa’amata’u ‘e Bainimarama ‘iā Tudravu ‘e ono fa’ate’a,  pe ‘afai na te lē usitaia le fa’atonuga ‘e fa’ate’a ia ali’i ‘ōfisa e to’alua. ‘O lo’o mōlia Qiliho ‘i mōliaga ‘e lua ‘o le fa’aaogā sesē ‘o lona tofiga, o lo’o tu’ua’ia ‘i le lē sa’o ‘o le iloiloina ‘o le fa’ai’uga ‘a Tudravu ‘e fa’atatau ‘i ia leoleo, ma tu’ua’ia ai le lē usita’ia ‘o tūlāfono talafeagai ‘a leoleo. 

Link to FijiTimes (Article): https://www.fijitimes.com.fj/judgment-deferred-to-october-2-for-bainimarama-and-qiliho-in-abuse-of-office-case/

ATA: Andrew Naidu (FijiTimes).