Toe filifilia Ma’amau ‘i le tofi Peresetene ‘o le Mālō Kiribati

‘Ua fa’amaonia mai le toe filifilia ‘o le ali’i ‘o Taneti Ma’amau, ‘i le tofi Peresetene ‘o lona mālō ‘o Kiribati, ‘o lona tolu ai lenei ‘o ana nofoa’iga soso’o.  ‘O le Aso Faraile talu ai na fa’atino ai le pālota ‘a lenei atunu’u ‘o le Pasefika, mō le filifilia ‘o se peresetene mai sui tauvā ‘e to’atolu.

‘O se līpoti mai le ‘Ōfisa ‘o le Komesina Maualuga ‘o Niu Sila ‘i Kiribati, na tā’ua ai ‘e fa’apea, na maua ‘e le ali’i peresetene ‘o Ma’amau le 55 pasene ‘o le pālota, fa’atusa ‘i le 42 pasene ‘a le sui na tūlaga lua atu ‘iā te ia.  Mā ‘o lea ‘ua ‘uma ‘ona fa’amaonia lona filifiliga ‘e le Fa’amasino Sili ‘o le atunu’u, ‘o Tetiro Semilota.

Mā ‘o le palemia ‘o Niu Sila ‘iā Christopher Luxon le ulua’i ta’ita’i ‘o le Pasefika, ‘ua ia fa’ao’o atu le fa’amālō āloa’ia ‘i le ali’i Peresetene ‘ua toe tūla’i mai ‘o Ma’amau.

Link to RNZ (Article) translated by Lauano Ilaoa: https://www.rnz.co.nz/news/pacific/532035/nz-welcomes-collaboration-with-kiribati-astaneti-maamau-wins-third-term-as-president

ATA:  RNZ Pacific / Koro Vaka’uta